Меркел со поддршка за обнова на преговорите за „Јужен тек“

Добивај вести на Viber

Германската канцеларка, Ангела Меркел, денеска го поддржа барањето на Бугарија за одржување нови преговори со Русија за проектот „Јужен тек“, кој официјална Москва го сопре на почетокот од овој месец.

„Мора да ги разгледаме сите правни прашања поврзани за проектот „Јужен тек“ и потоа да ги искористиме за напредок на разговорите со Русија„, изјавила германската канцеларка по разговорот со бугарскиот премиер, Бојко Борисов, што се одвиваше во Берлин.

Таа додала дека до сега се потпишани голем број договори и дека за двете страни важно е да останат верни партнери, додека бугарскиот премиер изразил уверување дека настанатите проблеми ќе бидат решени.

„Сметаме дека руското и бугарското партнерство мора да продолжи врз правна основа, во спротивно ќе го прекршиме договорот кој во 2006 година беше потпишан со Бугарија, а не со Европската унија“, истакнал Борисов.

Како што потсетуваат странските медиуми, рускиот претседател, Владимир Путин, ја изненади Европа на први декември кога објави дека се откажува од изградбата на проектот „Јужен тек“, наведувајќи дека единствена причина за ваквата одлука е противењето на ЕУ.