Мицкоски: Се подготвува нов Закон за игри на среќа

Добивај вести на Viber

Новата влада подготвува законско решение за ревидирање на сето она што го направи претходната власт во однос на Игрите на среќа. Премиерот Христијан Мицкоски е убеден дека законите се прекршени, па затоа најави сеопфатен преглед, подвлекувајќи дека ќе има одговорност за сите прекршители.

„Подготвуваме законско решение кое ќе значи, прво, преиспитување на сето она што го дала претходната влада, сите тие договори што се дадени затоа што сме длабоко убедени дека овде се прекршени законите и тука некој мора да одговара. ... Второ, мора да го ревидираме пристапот, имено начинот на оданочување, начинот на условите, локациите и слично за да биде сеопфатно законско решение, кое ќе биде поправедно и во исто време ќе најдеме одговорноста за сите досегашни незаконски работи“, изјави Христијан Мицкоски, премиер.

Предлог-законот за коцкање предвидуваше преместување на коцкањето на 500 метри од образовните и верските институции, истовремено зајакнување на условите и зголемување на вредноста на новите лиценци за казино.

Според тогашната опозиција, ова се сметало за измама, нагласувајќи дека со овој закон коцкањето не се отстранувало од децата и младите, туку тие всушност се зближувале преку уреди и интернет конекција.

ВМРО-ДПМНЕ и ВЛЕН критикуваа дека предлогот е камуфлажа за легализирање на нелегалните коцкарски активности кои директно ги поврзуваат со сомнежите за вмешаност на тогашниот прв вицепремиер Артан Груби и неговите блиски луѓе.

Овој предлог закон прво помина во Собранието, но потоа не доби согласност од поранешниот претседател Стево Пендаровски, кој одби да го потпише, поради злоупотреба на европското знаме. Законот во третото читање не успеа да го помине филтерот на собранието бидејќи за него гласаа само 51 пратеник, а беше потребно мнозинство од 61 глас.