Миноски се сомнева во раст од 5%, но да не ја утна годината?

Добивај вести на Viber

Поранешниот министер за финансии Кирил Миноски во интервју за Алфа тврди дека раст на домашната екомонија од 5% е многу тешко остварливо, особено ако не се продолжи со спроведување на досегашните успешни економски политики за кои владата на Заев најави ревизија и многу промени.

- Мислам дека е тешко достижно во 2017-та да имаме стапка на раст на економијата од 5%. Треба да се види кои се економските политики кои ќе ги спроведува новата влада, какви мерки ќе бидат спроведени во делот на деловното окружување. Македонија во 2017-та на листата Дуинг Бизнис се наоѓа на 10 место во светот и 5 во Европа. Тоа се мерки кои се добри за економијата, кои ги забрзуваат процедурите, ги надминуваат административните бариери и треба да се продолжат и во наредниот период. Многу е важно да се види какво ќе биде расположението кај инвеститорите, и странски и домашни, бидејќи тие директно влијаат врз економскиот раст и да се види какви ќе бидат промените кои ќе бидат креирани во фирмите на микро план, дали ќе биде надмината таа бариера која постоеше кај инвеститорите поради политичката криза, дали ќе има нови проекти? Дали е достижна таа стапка од 5% во 2017? Според мене е тешко остварлива. За 2018 година добро е Македонија да има и стапки над 5% ако е тоа можно.

Миноски како министер не обезбеди раст поголем од 2%, па затоа и зачудува зошто сега е толку критичен за идниот развој на македонската економија. Сепак, ваквите сомнежи на Миноски се многу чудни бидејќи никој не разговара за раст од 5% годинава што за многумина е невозможна мисија, па дури и НБРМ ја корегираше својата прогноза и ја намали на раст од 2,5%. 

Секако, ветувањата на Заев мора внимателно да се набљудуваат и да се врши постојан притисок за нивно исполнување, особено на економските реформи кои се најавени, па во текот на мандатот да се бара и одговорност за нивно исполнување и сеопшто подобрување на македонската економија.