Младите Македонци тешко се делат од родителскиот скут

Добивај вести на Viber

Во Македонија, 83 отсто од младите луѓе на возраст од 16 до 29 години живеат со своите родители. Овој удел е многу поголем кај младите мажи и изнесува завидни 96,6 отсто, додека кај девојките е само 68,5 отсто, што се должи на напуштањето на родителскиот дом поради мажачка.

Европскиот просек на млади луѓе на оваа возраст кои се уште живеат под ист кров со родителите изнесува 68,2  отсто. Според полот, податците на Евростат покажуваат дека 73,3 отсто од европските момчиња живеат со родителите, додека кај младите жени процентот изнесува 62,9 отсто, односно разлика од 10,4 процентни поени.

Според социологот Илија Ацевски, покрај неповолната економската ситуација во земјава, големо влијание за доцното осамостојување на младите луѓе има и психолошкиот момент, односно традиционалната матрица на македонските родители, кои повеќе сакаат децата да им се блиску до дома отколку да се борат за своето место во реалниот свет.

- Најпрво, сиромштијата го прави своето. Токму кај оваа попуација е и најголемиот процент на невработени лица во земјава. Младите тешко наоѓаат работа, а не пак добро платена работа, која ќе им овозможи да купат стан и да се одделат од родителите. Затоа, се уште имаме по две- три генерации од едно семејство кои живеат под ист покрив, а многумина преживуваат од пензиите на највозрасните.  И второ, не помалку занемарлив е психолошкиот момент. Многу родители не ги пуштаат децата да се осамостојат, сакаат да им бидат блиску, се однесуваат премногу заштитнички кон нив, иако според годините треба да се веќе зрели луѓе. Кај нас, неретко ќе видите 35- годишници како живеат под закрила на родителите, а на пример, во САД, секој полнолетен или студент е оставен сам на себе да се снајде во животот- вели професорот Ацевски.

Според Евростат, во секоја земја-членка на ЕУ, процентот на млади жени кои живеат во родителскиот дом е помал од оној кај младите мажи. Најголеми разлики помеѓу половите се забележани во Бугарија (19,3 п.п.) и Романија (17,2 п.п.), додека најниски беа забележани во Шпанија (5,7 п.п.), Шведска (4,7 п.п.) и Малта (4,6 п.п.).

Најголем дел од младите мажи што живеат со нивните родители се регистрирани во Хрватска (93,1 отсто), Словачка (89,2 отсто), Италија (88,3 отсто) и Малта (87 отсто), додека за млади жени најголеми удели се регистрирани во Малта (82,4 отсто) и Хрватска (82,3 отсто). Најниските проценти за двата пола биле забележани во Финска (40,8 отсто за млади мажи и 30,1 отсто за млади жени) и Данска (39,5 отсто за млади мажи и 31,9 отсто за млади жени).

Инаку, во Бугарија уделот на млади луѓе кои се уште не се одвоиле од родителскиот скут изнесува 73,1 отсто, Грција 82 отсто, Хрватска 87,8 отсто, во Србија 79,5 отсто, а во Словенија 89,3 отсто.

М.Б.

фото: onedio.ru