ММФ ќе ја спасува Украина со 17, 5 милијарди долари
Објавено во: Економија 11 Март, 2015
17, 5 милијарди долари е сумата одобрена од Меѓународниот монетарен фонд, која ќе и се додели на Украина за справување со кризата во период од 4 години, ова го соопштила претседателката на ММФ, Кристин Лагард, пренесуваат агенциите.
„Овој нов 4-годишен продолжен режим ќе ја поддржи непосредно економската стабилизација во Украина и сет од комплексни и далекусежни реформи во политиката. Тие се насочени кон обновување на одржлив раст на среднорочен план и подобрување на животниот стандард на украинскиот народ“, изјавила Лагард.
За помалку од една година ова е втор обид украинската економија да биде спасена од пропаст. Во изјавата на шефицата на ММФ Кристин Лагард не се наведува големината на првата транша за Киев, ниту кога ќе биде доставен.
Се очекува кредитот на Фондот да биде проследен со заеми од други донатори. Вкупниот обем на финансиската помош за земјата треба да достигне 40 милијарди долари, додека останатите средства ќе бидат обезбедени од Европската унија, одделни земји-членки и од приватни инвеститори.
Во април ММФ објави програма за доделување на заем од 17 милијарди евра, од нив Украина доби 4.5 милијарди долари.
На почетокот на минатата година, долгот на Украина беше 40 отсто од БДП, а на крајот на годината дојде 60 проценти од БДП поради воената криза.