Добивај вести на Viber
МВР соопшти дека е пронајдено лицето кое вееше знаме на „Голема Албанија“ во Тетово при дочекот на косовскиот премиер Албин Курти од страна на тетовскиот градоначалник Билал Касами и дека ќе следува кривична пријава за сторителот. Станува збор за извесен А.М.(21) од Германија.
„Одделот за криминалистичка полиција- Сектор за општ и насилен криминал во содејство со СВР Тетово го расчисти кривично- правниот настан кој се случи на 11.08.2023 на плоштадот во Тетово, при посетата на косовскиот премиер Албин Курти, кога беше развиорено знаме на т.н. „Голема Албанија“, со што е сторено кривично дело по чл.319 од КЗ. По преземени оперативно тактички мерки, утврден е идентитетот на лицето кое го сторило кривичното дело- А.М.(21), кој е германски државјанин. Во координација со ОЈО Тетово, против лицето ќе биде поднесена кривична пријава по член 319 од КЗ до надлежното обвинителство за натамошно постапување“, соопшти МВР.
Инаку од Основен суд Тетово испратија покана до локалната самоуправа и бараат претставник на општината да дојде на судско рочиште на 15 септември поради сторен прекршок при пречекот на косовскиот премиер Албин Курти, односно неспроведување на Законот за употреба на грбот, знамето и химната.
Градоначалникот на Општина Тетово и претседател на Движењето БЕСА, Билал Касами, денеска доби покана за распит во Основниот суд во Тетово, поради настанот од 11 август, денот на приемот на косовскиот премиер Албин Курти во градот.
Причината е интонирањето на албанската химна и веењето на албанските знамиња.