На што ќе ги потроши останатите 1,3 милиони евра општина Центар од „Скопје 2014“?
Објавено во: Македонија 21 Март, 2018
Општина Центар на располагање има околу 1,3 милиони евра од огромната сума на буџетски дотации доделени од страна на Владата на РМ за изведување и довршување на проектот „Скопје 2014“. Сепак, оваа сума наместо за споменици општина Центар одлучи да ја пренамени за други проекти, за што вчера доби и одобрение на владина седница.
„Во периодот од 2007 до 2013 година како капитални дотации од Буџетот на сметката на Општина Центар биле префрлени 3,5 милијарди денари за изградба на фонтани, спомен обележја, летниковец, колонада, постаменти за споменици и скулптури од проектот ‘Скопје 2014’. Потрошени се 3.463.845.343 денари, а нереализираните средства изнесуваат 83.544.657 денари, кои Општина Центар ќе ги искористи за капитални проекти“, соопштија од Општината.
Со овие пари, ќе се платат доспеаните обврски за изградба на мостови и катна гаража, обврските од судските спорови од времето кога градоначалник беше Владимир Тодоровиќ и ненаменско трошење на средствата.
„Парите ќе бидат пренаменети и за изградба и реконструкција на друга инфраструктура согласно Програмата за уредување на градежно земјиште на општината“, се вели во соопштението.