На Заев му е доделен година и пол стар владин „пасат“

Добивај вести на Viber

На Зоран Заев како претседател на Владата на РСМ на кому му престанала функцијата му е доделено владино службено возило „фолксваген пасат лимузина“ произведено во 2018 година и со моторна зафатнина од 2.000 см3 со владина одлука по престанувањето на неговиот мандат на почетокот на оваа година. 

Според измените на Законот за Влада направени во 2016, претседателот на СДСМ има право да го користи овој автомобил дури и доколку не биде повторно премиер, односно во вкупно траење од две и пол години, колку што до сега бил шеф на Владата.

„Заев синоќа иако не е премиер, повторно ги злоупотреби државните ресурси и на дуелот се појави со државно обезбедување, возила и советници кои не му следуваат како претседател на СДСМ и за кои не постои никаква основа да ги користи“, гласеше коментарот на опозициското ВМРО-ДПМНЕ по ТВ-дуелот помеѓу лидерот на СДСМ и претседателот на најголемата опозициска партија Христијан Мицкоски во петокот.

Сепак, ваква „привилегија“ Службата за општи и заеднички работи на Владата  им овозможила и на претходните премиери - Никола Груевски и Емил Димитриев со измените на Законот за Влада во 2016. Од тогаш на претседателот на Владата на кој му престанала функцијата, покрај правото да користи владино возило и службен возач онолку време колку што бил претходно премиер, има право и на лично обезбедување од шест лица вработени во МВР. по свој избор. 

Претходната Влада на седницата одржана на 31 мај 2017 пред самото нејзино заминување на Груевски му додели фолксваген пасат 3ц произведен во 2015 година. Новата Влада на 19 октомври 2017 година му додели на Димитриев исто така службено возило марка пасат од 2015-та. Рокот за користење кај Груевски е околу десетина години, коку што претходно беше на чело на „Илинденска“, додека времето на Димитриев е една година, односно колку што е минимално пропишаното. На оваа привилегија право ќе има и Оливер Спасовски, актуелниот технички премиер.

Според договорот кој го постигна СОЗР со економскиот оператор во јули 2018, Владата направи оперативен лизинг (деловен закуп) за 45 нови моторни возила со времетраење од 36 месеци. Владините функционери ќе може да ги користат автомобилите додека не поминат 120.000 километри.  Сите понудени возила се од марката Volkswagen Passat Comfortline 2.0 TDI.

Месечниот лизинг за едно возило изнесува 67.538 денари со пресметан данок. Вкупната вредност на договорот е 109 милиони денари. Операторот ќе треба редовно да ги сервисира, регистрира, осигурува, транспортира и да ги обезбедува сите потребни документи и делови.

Александар Кузмановски