НАПРАВЕНО ВО УГАНДА: Би го купиле ли овој автомобил?

Добивај вести на Viber

Неколкумина инженери од Уганда изработиле електричен автомобил, а претседателот на оваа земја е толку воодушевен од нивната работа, што одлучил Уганда да тргне по патот на земјите со силна автомобилска индустрија и да застане „рамо до рамо“ со Германија и Јапонија. Проектот за електричен автомобил произведен во Уганда настанал во дворот на една деловна зграда во Кампала и е дело на двајца инженери. Тие работеле по методот обид и грешка, па и самите не се сосема сигурни што точно можат да очекуваат од конечниот производ. „Уште експериментираме како оптимално да ја искористиме сончевата енергија тука блиску до екваторот“, вели координаторот на проектот Пол Мусасизи. Кога својата визија му ја претставил на претседателот на Уганда Јовери Мусевени. тој толку се воодушевил што решил земјата да ја претвори во автомобилска велесила како Германија, Јапонија и САД. Затоа Мусевени веќе наредил од 2016-та година да започне да се гради голема фабрика на автомобили. Исто така, тимот на Мусасизи добил дополнителни средства од државата за истражување, па освен првиот мал електричен двосед за градско возење направиле и вистинска лимузина на хибриден погон. Следен проект за нив се очекува да биде производство на автобус. Во фабриката треба да работат околу 5.000 работници, а за сега во работилницата на Универзитетот има само 25. Мусасизи е сигурен дека Уганда е способна сама да произведе цело возило. „На почетокот во Уганда веројатно ќе ги составуваме деловите. Во Кенија се произведува стакло, во Танзанија гуми. Од тоа можеме да направиме сопствен автомобил. За околу седум години ќе бидеме во состојба да направиме и сопствен мотор“, вели овој истражувач. Неговата цел е годишно производство од 3.000 автомобили, што е квота што гигантот Тојота, на пример, ја исполнува за само три часа. Но, Уганда не е Јапонија и станува збор за сиромашна земја, во која главни стопански гранки се земјоделството и рибарството. Ретко кој може да си дозволи да купи велосипед, а автомобил вреден 20.000 евра не може да си дозволи речиси никој. Претседателот на Уганда за целиот проект издвои 350 милиони долари затоа што сепак е уверен во неговиот успех, надевајќи се пред се на шансата за пласман во соседните земји.