„НАТО ПОВЕЌЕ НЕМА ДА СЕ ПРОШИРУВА“ Вашингтон со порака: Европа сама да ја консолидира и финансира својата безбедност

Добивај вести на Viber

Новата стратегија за национална безбедност на САД сигнализира најголем пресврт во трансатлантските односи во последните децении, со јасна порака: НАТО повеќе не е алијанса што ќе се шири, а Европа мора да преземе примарна одговорност за сопствената безбедност.

Во документот, Европа се опишува како континент во „цивилизациски пад“, погоден од демографски кризи, масовна миграција и, како што стои, политички елити кои ја поткопуваат демократијата. Стратегијата директно ги обвинува европските лидери дека ги блокираат американските напори за завршување на војната во Украина и дека ги игнорираат „сопствените граѓани кои бараат мир“.

Најдиректниот удар доаѓа во делот посветен на НАТО:
САД официјално бараат крај на перцепцијата на НАТО како алијанса што постојано се проширува, со што се отвора простор за потенцијално реструктурирање на целата архитектура на европска безбедност. Со ова завршува долга ера на американско раководство во источна Европа.

Стратегијата најавува политика на „префрлање на товарот“, според која САД ќе се дистанцираат од дел од европските кризи и ќе го насочат воениот и политичкиот фокус кон региони што ги сметаат за критични, особено Западната хемисфера и Индо-Пацификот.

Европа, според документот, мора:

• сама да ја финансира својата одбрана,

• да ја консолидира сопствената безбедност,

• да функционира како група независни национални држави наместо како централизиран блок.

Дополнително, стратегијата отворено го поздравува растот на евроскептичните, националистички партии во Европа, сметајќи ги за „потенцијални двигатели на враќањето на вистинската демократија“ и на „заштитата на националните идентитети“.

Оваа промена ги вознемири европските престолнини, каде што расте стравот дека САД не само што го намалуваат ангажманот во Европа, туку и дека може да извршат притисок врз Киев да направи отстапки во мировен договор што би ја зајакнал позицијата на Москва.