Навалете на ефтини лекови!

Добивај вести на Viber

Намалување на цените на 346 лекови ќе биде реализирано од 15 октомври оваа година, од кои 139 се иновативни, а 207 се генерички лекови, изјави денеска министерот за здравство, Никола Тодоров. Министерот вели дека ќе се намалат и цените на поголем број цитостатици. - Согласно одредбите на новата методологија, што стапи на сила од 1 февруари, оваа година, вкупно се намалени цените на 1.636 лекови, заедно со претходно намалените 1.290 лекови што дополнително ќе придонесе за поголема достапност на лековите до граѓаните кои имаат можност овие препарати да ги набавуваат по поевтини цени како и поголема заштеда на здравствениот систем – рече министерот Тодоров. Тој посочи неколку лекови кај кои ќе има драстично намалување на цените, како „Клопидогрел“ за најтешко срцевоболни и со прележан инфаркт, кој од 1.500 се снижува на 996 денари. Цената на „Аторвастатин“ за покачени масти се намалува за 70 отсто, за речиси 60 проценти ќе биде поевтин и лекот „Оланзапин“. Од 18 до 40 отсто ќе бидат намалени и цените на некои антибиотици (како „Цефтриаксон“, „Панцеф“…).