НЕ Е ЛОШО: КАКО СРАБОТЕ КОМПАНИЈАТА НА СЕМЕЈСТВОТО НАКОВИ ЗА ДЕВЕТ МЕСЕЦИ - чист профит од 1,5 милиони евра

Добивај вести на Viber

И во услови на криза, групацијата на семејството на бизнисменот Штерјо Наков покажа дека умее да работи не само профитабилно, туку и да го зголеми финансискиот резултат. Во првите девет месеци од годинава групата „Ферршпед“ остварила профит од 1,5 милиони евра, што е пораст од 12 проценти во однос на истиот период лани, говоири Билансот на успех на компанијата.

Во своето образложение на финансискиот резултат се наведува и дека компанијата остварила значајна оперативна добивка, што е всушност добивката пред даночењето, и тоа на износ од 1,61 милиони евра.

Да одиме со ред и да видиме што покажува билансот на успех на оваа шпедитерска компанија.

Кога станува збор за оперативните приходи, односно за приходите што се остварени од основната дејност на компанијата, се гледа дека тие во првите девет месеци од годинава биле на ниво од 60 милиони евра, што е раст од 5 отсто во однос на истиот период лани.

Притоа, практично сите приходи што се остварени, се приходи од продажба, а најголемиот дел од нив се од продажба на домашниот пазар, и тоа дури 57,6 милиони евра. Во однос на истиот период од претходната година тоа е зголемување за седум проценти. Додека, пак, кај приходите од продажба на странскиот пазар има намалување за 18 отсто, но тие се сосема мал и незначаен дел од работењето на оваа шпедитерска компанија. Намалени се и останатите оперативни приходи на компанијата, и тоа за 50 проценти, односно тие сега се на ниво од 153 илјади евра, што е исто така речиси минорен дел од вкупните приходи.

Пораст има и кај оперативните расходи, и тоа за 5 отсто, така што тие на крајот на првите три квартали од годинава изнесувале 58,2 милиони евра.

Најголем дел од трошоците отпаѓаат на услуги со карактер на материјални трошоци, и тоа изнесуваат 48,2 милиони евра, што е раст за еден отсто во однос на истиот период лани.

Набавната вредност на трговските стоки пораснала за 16 отсто, а најголем пораст има кај трошоците за суровини и материјали, и тоа за дури 103 отсто, но тие претставуваат релативно мал дел од вкупните расходи.

Финансиските приходи бележат пад во однос на истиот период минатата година, а финансиските расходи, пак, имаат пораст.

Или, како што велат од компанијата, Група Фершпед АД Скопје во периодот јануари-септември 2022 година прикажува добивка од редовно работење и нето добивката пред оданочување во анализираниот период изнесува 101.223 илјади денари, или 1,65 милиони евра.

Инаку, во Фершпед најголем поединечен акционер е една друга партнерска шпедитерска компанија - „Макошпед“, со 19,65 отсто, додека, пак, синовите на Штерјо Наков, Драган Наков и Сашо Наков поседуваат по 11,83 и 11,06 отсто од капиталот.

Фабриката за чоколади Европа во Фершпед располага со 9,66 отсто, а самиот Фершпед си има 9,99 проценти сопствени акции во компанијата.

Инаку, Фершпед е доминантен сопственик мна Хотели Метропол Охрид, со над 73 проценти, а неодамна се појавувија информации дека шпедитерската компанија бара купувач за овој угостителски објект.

Н.Н.Ф.