НЕМА КАЗНИ ЗА ДИРЕКТОРИТЕ ШТО НЕ ДАЛЕ ЗГОЛЕМЕНА ДНЕВНИЦА ЗА РАБОТА ВО НЕДЕЛА - инспекторите само им наложиле да ја исплатат

Добивај вести на Viber

Веќе втор месец како важат законите со кои работниците добија право да одмараат во недела, освен оние неколку дејности кои се одредени како исклучоци, па веќе испливаа на виделина и некои газди кои не сакале да ги исплатат зголемените дневници кои се одредени со новата законска регулатива. 

Тоа во своите последни контроли го откриле инспекторите на Државниот инспекторат за труд.

Како што е познато, во дејностите кои се сметаат за исклучок од недела неработен ден, работниците треба да добијат дополнителна дневница од 50 отсто, додека, пак, оние што работеле во недела а се вработени во трговските објекти, треба да заработат зголемување на дневницата за 100 проценти, или двојна дневница. Така е предвидено со измените на законите за работни односи и за трговија, па Државниот инспекторат за труд, покрај со контролите кои од поодамна ги прави за тоа кои од фирмите што не смеат или не пријавиле, сепак работат во недела, стартуваше и со проверките кои од газдите ги исплатиле или не додатоците за плата за оние работници што работеле во недела.

Но, засега за овие компании, како и за нивните газди или директори, не е изречена никаква казна, туку само им било дадено решение да им го исплатат додатокот на плата на работниците.

Тоа се случило со четворица работодавачи.

Она што е интересно, е дека дури 11 фирми, не им ни доставиле документација на трудовите инспектори за тоа дали исплатиле зголемена дневница или не на работниците што работеле во недела.

„Во врска со исплата  на додаток од плата, при извршените вонредните инспекциски надзори, утврдено е дека 25 работодавачи исплатиле додаток од плата за работа во недела, а  четири работодавачи не исплатиле додаток од плата за работа во недела, и за истите е изречена мерка решение за исплата на додаток. Кај другите 11 работодавачи дадено е задолжување за достава на документација“, се вели во извештајот на ДИТ за последните контроли кои биле направени во последната недела.

Инаку, од инспекторатот нагласуваат дека ќе продолжат со вршење на вонредни инспекциски надзори во недела, поради доследна примена за одредбите од Зконот за работни односи и Законот за трговија.

Во последната недела биле направени 43 вонредни контроли, а само еден газда добил клуч на врата.

„На ден 20.02.2022 година извршени се вкупно 43 вонредни инспекциски надзори во 9 региони на територијата на РСМ од страна на дежурните инспектори. При инспекциските надзори утврдени се неправилности кај седум работодавачи кои не го почитувале Законот за работни односи и Законот за трговија, при што донесени се следниве инспекциски мерки: решение опомена добиле вкупно шест работодавачи, поради непочитување  на одредбите од Законот за работни односи според чл.134 ст.7 или по други основи, а решение забрана за работа било изречено кај еден работодавач, поради непочитување на одредбите од Законот за трговија чл. 50-а ст.3“, се вели во соопштението од Државниот инспекторат за труд објавено на нивната веб страница.

Инаку, Државниот инспекторат за труд ги објави и сите објекти кои работеле во неделите во јануари, односно во првиот месец од оваа година, а кои за тоа уредно дале известување до ДИТ по електронски пат, односно на електронската имејл адреса rabotavonedela@dit.gov.mk за месец јануари 2022 година.

Од оваа листа може да се види дека во јануари во недела работеле 2.400 објекти. Притоа, треба да се напомене дека не станува збор за 2.400 компании, туку за помалку, бидејќи во објавената листа се опфатени по повеќе објекти на некоја фирма, на пример трговска компанија или синџир на бензински пумпи, односно сите нивни објекти кои биле пријавени за работа во недела во јануари оваа година.

Притоа, од листата може да се види дека доминираат бензински станици, трговски објекти, угостителски објекти, индустриски капацитети, компании за производство на брза храна и слично.

Н.Н.Ф.