НЛБ Банка ја подобри пазарната позиција! Колкава добивка оствари лани?

Добивај вести на Viber

Една од трите системски банки лани ги зголеми кредитните пласмани за 6 отсто, а вложувањата во хартии од вредност поточно во државни обврзници лани се зголемени за 50 отсто во споредба со претходната година. Добивката на НЛБ Банка лани е 27,7 милиони евра

НЛБ Банка лани ја зголеми својата пазарна позиција затоа што го зголеми кредитното портфолио за 53,4 милиони евра, оствари исто ниво на нето приходи од камати, ги зголеми нето приходите од провизии и надоместоци и оствари добивка од 27,7 милиони евра. Со овие резултати во услови на перманентни и бројни ограничувања во националната и во глобалната економија предизвикани од „корона“ пандемијата НЛБ Банка оствари солиден резултат.

Нето приходите од камати лани се речиси на исто ниво со 2019 година и изнесуваат 47,4 милиони евра. Вкупните приходи од камати надминуваат 54 милиони евра, а расходите за камати се 6,8 милиони евра.
Втората по големина приходна ставка се провизиите и надоместоците. Од нив банката, на нето основа, инкасира 18,26 милиони евра и тоа е за 306.000 евра повеќе од 2019 година.

Од останати приходи лани банката остварила 4,5 милиони евра, а нето приходите од курсните разлики изнесуваат 3,9 милиони евра. И кај двете приходни ставки резултатите се подобри во споредба со 2019 година.

Резервациите, очекувано, се зголемени во однос на претходната година. На крај на 2020 година нивната вредност во билансот е 10,94 милиони евра и тоа е за 4 милиони евра повеќе од претходната година.

Добивката по оданочување лани изнесува 27,7 милиони евра и тоа е за 2,4 милиони евра помалку од 2019 година. Добивката по акција изнесува 32,4 евра.

Од билансот на состојба значајно да се истакне е тоа што НЛБ Банка лани ја подобрила својата пазарна позиција и тоа е изразено преку нивото на кредитирање. На крај на 2020 година кредитното портфолио (со исклучок на аранжмани со банки) изнесува 943 милиони евра и тоа е за 53,4 милиони евра повеќе од претходната 2019 година. Тоа е за 6 отсто повеќе и тоа во услови на пандемија од COVID 19. Менаџментот на банката во дадените економски ограничувања од пандемијата го зголемил кредитното порфолио, но вложувал и во државни хартии од вредност. Вложувањата во обврзници т.е. во хартии од вредност изнесуваат 266,1 милиони евра и лани се зголемени за 88,7 милиони евра. Во споредба со претходната година растот на вложувања во државните обврзници и записи изнесува 50 отсто и тенденцијата на овие пласмани кај НЛБ Банка е слична како и кај „Комерцијална банка“.

 Депозитите на крај на 2020 година се 1,29 милијарди евра и во споредба со 2019 година се зголемени за 115,4 милиони евра.