Нова зграда никнува во Карпош: ДУП кроеа едни советници, одобрение дале други

Добивај вести на Viber

Параван, градежна механизација на местото каде претходно се наоѓаше пералница за автомобили и стара барака. Нова зграда никнува во општина Карпош на улицата „Митрополит Теодосиј Гологанов“ во Тафталиџе, близу маркетот Веро. На местото пред пожарникарската станица ќе се гради објект за домување кој и претходно бил предвиден во деталниот урбанистички план. Сепак одобрението за градење е издадено во ноември годинава. Во близина на оваа зграда во последниот период се изградија и други згради за живеење, меѓу нив, и таа на градежната компанија Настел која има прилично голем број станови.

Фактор упати прашање до општина Карпош за тоа што е планирано да се гради на оваа локација и кои се инвеститорите. Од минатата недела местото е обезбедено и заградено со градежен параван. Од општината велат дека според важечкиот ДУП на посочената парцела е предвидена намена на градба А2-Домување во станбена зграда. 

„Издадено е Одобрение за градење од 19 ноември годинава, на инвеститорите Друштво за трговија "СМС ШОПС" Дооел експорт – импорт Скопје и Наџи Шабан од Скопје, за градење на објект А2:Домување во станбени згради, на улицата "Митрополит Теодосиј Гологанов", бр.бб, стои во одговорот од општината.

Велат дека според геодетски елаборат за нумерички податоци за градежното земјиште сосопственици на земјиштето се Друштво за трговија "СМС ШОПС" Дооел експорт – импорт Скопје, Наџи Шабан од Скопје и Георге Пасков од Мокрино.

Додаваат дека ДУП-от за овој дел од Карпош односно таму каде што се наоѓа маркицата е донесен од претходниот состав на Советот на општината или составот од 2013 до 2017 година, што значи дека е важечки.

Деновиве е актуелно прашањето за изградбата на објекти и забраните кои ги ставаат општините па градежниците имаа поплаки. Сепак некои градежни работи не се запрени.

А.Т.