Нови задолжувања во 2022: Најмногу за железничко поврзување со Бугарија

Добивај вести на Viber

Државата и оваа година ќе се задолжува за проекти кај меѓународните кредитори, според програмата за работа што ја објави Владата за 2022, а најголемиот кредит треба да се подигне за железничкото поврзување со Бугарија.

За време и по летниот период 100 милиони евра ќе се бараат за рехабилитација на третата фаза Крива Паланка - Деве Баир од железничкото поврзување со Бугарија што Министерството за економија треба да го иницира во јуни кај Европската банка за обнова и развој.

Инаку потегот од Крива Паланка до Деве Баир предвидено е да биде најскап и според претходни најави ќе чини 400 милиони евра. На трасата се предвидени 50 мостови и 30 тунели, а најдолкиот тунел ќе минува под Деве Баир и ќе биде долг 5 километри и ќе има граничен премин под земја. само овој тунел ќе чини 70 милиони евра.

Министерството за финансии ќе бара 50 милиони евра од Европската инвестициска банка за дополнително финансирање на тековниот проект„Водоснабдување и одведување на отпадни води во општините“. 

Од истата меѓународна финансиска институција ќе се бараат и 25 милиони евра за хидросистемот Злетовица за наводнување и електрична енергија како втора и трета фаза, од кои оваа последната се состои од изградба на шест хидроцентрали.

Министерството за финансии во периодот што следува ќе бара 15 милиони евра кај Меѓународната банка за обнова и развој за проектот за воведување Интегриран информациски систем за управување со јавните финансии (IFMIS).

- Проектот е од исклучително значење за управувањето со јавните финансии, бидејќи ќе овозможи интегрирано следење на приходите и расходите од нивното планирање до целосната реализација, со што ќе се подобри управувањето со јавните финансии, најави претходно министерот за финансии, Фатмир Бесими, кој дополни дека со овој систем ќе се решат повеќе фискални предизвици, вклучително и реалистичното планирање и повисоката реализација на капиталните инвестиции.

За задолжување кај меѓународните финансиски институции со договор за кредитирање, потребно е претходно Собранието да изгласа соодветен закон за гаранција за враќање на овие задолжувања.

А.К.