Обама заврши во болница заради воспаление на грлото!

Добивај вести на Viber

Американскиот претседател Барак Обама вчера итно е префрлен во Воената болница „Волтер Рид“, откако се пожалил на силно воспаление на грлото. Лекарите констатирале дека тој страда од гастроезофагеален рефлукс, пореметување на желудникот кое е проследено со болка во грлото, повраќање и желудочни киселини. Неколку часа пред да биде префрлен во болница, Обама го надгледувал отоларинголог кој бил повикан во Белата куќа. Тој утврдил дека грлото на американскиот претседател е благо отечено, па препорачал дополнителни истражувања во болница, вклучително и ЦТ скенирање. Болницата „Волтер Рид“ важи за една од најдобрите во САД, но од Белата куќа тврдат дека Обама отишол таму затоа што му била најблиску, а имал претходно закажани обврски. Наодите од дополнителните испитувања биле уредни, па откако го констатирале пореметувањето на желудникот кај американскиот претседател, лекарите веднаш му препишале соодветен третман. Откако станал претседател Обама немал многу здравствени проблеми, а по последниот систематски преглед во мај лекарот соопштил дека здравјето на претседателот е во најдобар ред. Според лекарите, гастроезофагеалниот рефлукс лесно се третира, понекогаш само со промени во исхраната или со лесна терапија со лекови кои го намалуваат количеството на киселини во желудникот. Инаку, американскиот претседател беше страствен пушач, но неодамна ги оставил цигарите благодарение на никотинска гума за џвакање.