Од што „Макпетрол“ направи 28,5 милиони евра, а не е продажба на горива?

Добивај вести на Viber

„Макпетрол“ со своите над 120 бензински пумпи е голем малопродажен ланец со уште поголем неискористен потенцијал. Лани приходите од стоки за широка потрошувачка (грицки, сладоледи, цигари, пијалоци, чоколади и друго) достигна 28,6 милиони евра и тоа е 8,5 отсто од целиот приход од продажба на домашниот пазар

Најголемата домашна компанија за малопродажба на нафтени деривати лани направи приход од 28,6 милиони евра од продажба на сладоледи, смоки, грицки, сендвичи, безалкохолни пијалоци, цигари, козметика за возила, моторни масла и други стоки за широка потрошувачка кои можат да се најдат на повеќе од 100 бензиски пумпи на „Макпетрол“ ширум земјава.

Податоците покажуваат дека лани 8,5 отсто од продажбата на стоки на „Макпетрол“ во земјава е од останати стоки (кои ги набројавме погоре н.з.). Таа продажба изнесува 28,2 милиони евра и во однос на 2017 година е поголема за 1,43 милиони евра односно бележи раст за 5 отсто.

Со овие податоци „Макпетрол“ може да влезе и во конкуренција на најголемите ланци супермаркети во земјава кои бележат продажби околу 50 милиони евра на годишно ниво. Компаративната предност на „Макпетрол“ е во тоа што компанијата не ги плаќа своите вработени само да продаваат стоки за широка потрошувачка туку да точат бензини, ТНГ и дизел горива, а дополнително и да наплаќаат за стоките од широка потрошувачка кои се достапни на рафтовите во бензинските пумпи. Барем во најголем дел од бензинските пумпи ширум земјава, а ги има повеќе од 100, вработените се ангажирани за продажба на нафтени деривати и за наплата на производите кои се на рафтовите во бензинските станици.

Кој е „Макпетрол“ на македонскиот пазар за малопродажба на нафтени деривати?

„Макпетрол“ и понатаму суверено го држи приматот џин на македонскиот пазар. Неговата продажба лани надмина 355 милиони евра и тоа е за 17 отсто односно за 51 милиони евра повеќе од претходната година. Компанијата има повеќе од 120 бензински станици во земјава и се друго освен доминација би било изненадување. Неформално со толку малопродажни единици  „Макпетрол“ сигурно е најголемиот ланец на малопродажни места за стоки од широка потрошувачка во земјава. Според податоците од единечниот финансиски извештај нето добивката на „Макпетрол“ е 12,65 милиони евра и тоа е податок без останатата сеопфатна добивка која изнесува уште 1,38 милиони евра. Во споредба со лани нето добивката на гигантот е два и пол пати повисока од 2017 година.

Најголемиот ривал  „Лукоил“е три пати помал од „Макпетрол“ и покрај тоа што има раст на приходите од продажба за 18 отсто во однос на 2017 година. Добивката кај „Лукоил“ лани пораснала за 70 отсто во однос на претходната година. Вкупните приходи на „Лукоил“ кој има 4 пати помалку бензински пумпи од „Макпетрол“ (вкупно 30 низ цела држава според официјални податоци од нивната веб страница) лани изнесувале 114 милиони евра и во споредба со претходната година биле повисоки за 17,4 милиони евра. Нето добивката на компанијата лани е 3,58 милиони евра и е за 71 отсто повисока од 2017 година.

Р.Ф.