Одлуката потпишана: Владата подготвена да ги брани ставовите ако добие тужба за Иловица
Објавено во: Економија 02 Октомври, 2019
Владата е спремна да оди на суд доколку добие тужба од Еуромакс рисурсис за рудникот „Иловица“.
Министерот за економија го стави потписот на предлог одлуката за едностран раскин на договорот а следна е владината процедура. Од друга страна Бектеши рече дека Владата ги има аргуметите и дека не носат никакви емотивни одлуки туку одлуки во рамки на сите процедури и закони.
-Ако мислат дека би требало да одиме на некаков меѓународен суд, ние сме подготвени како држава и како Влада за да ги браниме нашите ставови. Одлуката на Второстепената комисија е конечна. Веќе е потпишана предлог-одлуката за едностран раскин на договорот со Иловица и сега ќе оди низ владини процедури, преку Генерален секретаријат, преку соодветните комисии и потоа на седница на Влада, каде треба да се расправа и да се донесе соодветна одлука, образложи Бектеши.
Од Еуромакс Рисорсис за Фактор веќе потврдија дека го добиле решението од Комисијата, но како што потенцираа многу е рано да кажат дали ќе тужат и кои ќе бидат нивните идни чекори.
„Ги анализираме деталите изнесени во Решението, како и импликациите кои ќе произлезат од истото. Во овој момент, е многу рано да се произнесеме која ќе биде нашата одлука за понатамошните наши чекори кои ќе бидат превземени. Поради тоа, не сакаме да даваме дополнителни коментари во врска со ова. Меѓутоа, во догледно време, откако ќе биде донесе конечна одлука, ќе бидете известени за нашите идни чекори“, велат за Фактор од Еуромакс Рисорсис.
Според нашите сознанија канадската компанија нема да избрзува со тужба, туку најверојатно ќе се обиде претходно да ги искористи сите други алатки што и стојат на располагање. Но доколку другите чекори не вродат плод, тужбата би била логичен исход. Колку таа ќе тежи засега не може да се шпекулира, но сигурно дека ќе биде на милионски износ, со оглед што компанијата таму планираше да вложи околу 340 милиони евра.