Оние кои го прележаа коронавирусот со една доза вакцина се подобро заштитени од здравите кои примиле две дози?

Добивај вести на Viber

Лицето кое имало ковид-19 и примило единечна доза вакцина на Pfizer / BioNTech или Moderna е подеднакво или дури и подобро заштитено од некој што никогаш немал коронавирус и примил две дози на вакцина, открива нова студија.

Резултатите од студијата беа објавени во New England Journal of Medicine, пренесува индекс.хр.

Научниците од Медицинскиот факултет Икан во планината Синај, Њујорк, проучувале примероци на крв од 110 лица, од кои 43 биле заразени со коронавирус пред вакцинацијата и 67 кои не биле.

Сите учесници добиле или Pfizer / BioNTech или Moderna вакцина заснована на новата гласник РНК технологија.

Пациентите брзо развиле изедначен, висок титар на антитела по првата доза

Откриле дека испитаниците кои биле заразени со коронавирус пред првата доза на вакцината „брзо развиле изедначен, висок титар на антитела во рок од неколку дена по вакцинирањето“.

Терминот титар ја означува концентрацијата на антитела.

Истражувачите повеќепати земале примероци и откриле дека во деновите по првата доза на вакцината, нивото на антитела кај оние кои преживеале коронавирусна инфекција е 10 до 45 пати поголемо отколку кај оние кои не биле заразени со коронавирус пред вакцинацијата.

Додека ја примиле втората доза на вакцината, нивото на антитела кај оние кои го преживеале коронавирусот сè уште било шест пати повисоко отколку кај оние кои не биле заразени.

„Не е забележано зголемување на титарот на антитела кај оние кои прележале ковид-19 по приемот на втората доза на вакцината“, напишаа истражувачите, укажувајќи дека дополнителна доза на вакцината е од ограничена корист за оние кои биле заразени.

Не е забележана разлика во производството на антитела помеѓу двете вакцини.

Тимот, исто така, проучувал дали има разлики во несаканите ефекти на вакцината меѓу 230 испитаници, од кои некои го надминале ковид-19, а други не.

Не се забележани сериозни несакани ефекти што довеле до хоспитализација.

Луѓето кои веќе имале развиено имунитет на коронавирус пред вакцинацијата, имаат поголема веројатност да имаат лесни до умерени несакани ефекти како слабост, главоболки, треска и болки во мускулите и зглобовите.

Но, тимот предупреди дека се потребни дополнителни истражувања за да се потврди ова.