Добивај вести на Viber
На Клиниката за инфективни болести во текот на ноќта починала пациентката која беше во критична состојба со листериозен менингоенцефалит, предизвикан од опасната бактерија листтерија.
Ова е четврти смртен случај од листериоза во Македонија месецов. Станува збор за пациентка на возраст од 55 години, која била хоспитализирана на 7 јуни на Одделот за интензивна нега на Инфективната клиника со главоболка, повраќање, покачена температура и други потешкотии.
Веднаш бил отпочнат третман со антибиотска терапија и останата супортивна терапија, при што дошло до одредено подобрување на нејзината здравствена состојба, но во текот на вчерашниот ден настапило нагло влошување на состојбата со застој на срцето. И покрај преземените мерки за интензивно лекување, во текот на ноќта состојбата се влошила и констатирана е смрт.
На Клиниката за инфективни болести нема нови пациенти со листерија, а се подобрува состојбата и на новороденчето кое со сепса од оваа бактерија е хоспитализирано на Клиниката за детски болести.
Како превентивна заштита од опасната бактерија, од Министерство за здравство препорачуваат да не се консумира сирова или недоволно термички преработена храна, посебно месо и преработки од месо, непастеризирано млеко, млечни производи и јајца, а сировата и подготвената храна да се чува во фрижидер одделно, во посебни заштитени садови, со што ќе се избегне можност за загадување на веќе подготвената храна.
Се препорачува и поголема хигиена, особено при подготовката на храна. Заради откриените случаи на листерија, надлежните институции спроведоа вонредни контроли на храната во продавниците, магацините и на зелените пазари, а резултатите ќе се знаат в петок.