Општина Битола: Да нема фобија против изолираните од Малта
Објавено во: Македонија 28 Март, 2020
Општина Битола, на чија територија нема досега пријавено ниту еден заболен од корона вирусот, им порача на битолчани да не шират фобија против сограѓаните кои се вратија со владиниот чартер од Малта и се сместени во државен карантин во центарот на градот.
Поголем дел од повратниците од Малта се од овој град и со одлука на надлежните јавни власти и со претходно одобрување за користење, се сместени во хотел „Широк Сокак“.
Од Општина Битола информираат дека лицата кои се во контролирана изолација имаат постојан полициски надзор, на сите им е извршен лекарски преглед и неоправдани се реакциите на социјалните мрежи во врска со одлуката за нивно сместување во централното градско подрачје.
–Изолацијата која до сега беше во сопствените домови, како мерка е подобрена со изолација контролирана на ваков начин и со 24 часовен надзор, а тоа не остава можност за непочитување на мерката изолација. Никој од изолираните не претставува опасност за градот затоа што тие постојано ќе бидат надгледувани, соопштуваат од секторот за односи со јавност на Општина Битола.
Локалната самоуправа апелира дека треба да надвладее разумот и не е потребно стигматизирање на битолчани кои се контролирано изолирани во својот град, а се вратиле по престој во странство.