Општина Струга го купила најскапиот автомобил на јавни набавки

Добивај вести на Viber

Општина Струга го купила најскапиот автомобил на јавни набавки во последните две и пол години, според истражувањето од Центарот за граѓански комуникации и истиот чини 66.000 евра.

Во истражувањето на овој тип на јавни набавки дојдено е до заклучок дека една четвртина од набавените нови возила се поскапи од 30 илјади евра. Најмногу нови возила набавила владината Служба за општи и заеднички работи, 46 „пасати“ по 39 илјади евра секој. Средната вредност на возилата купени од државните институции изнесува 17 илјади евра. 

Државните институции набавиле 392 нови патнички возила, за што потрошиле 8,1 милиони евра во последните две и пол години. Меѓу марките возила убедливо водат „шкода“ и „фолксваген“ од кои се купени 100, односно 88 нови возила, односно скоро половина од сите новонабавени возила се од овие две марки. 

Кај операторите, договори со најголема вредност постигнале „Порше лизинг“ со 3 милиони евра, кумановската „Делукс-ауто“ со 1,2 милиони евра, „Еуроимпекс“ со 890 илјади евра и битолската „Јосифов“ со 720 илјади евра.

Дури на 71 проценти од тендерите имало само по една понуда и покрај големиот број дистрибутери на нови возила во земјава. Ова го отвора сомнежот дека државните институции доминантно си купувале такво возило какво што сакале,“ се вели во истражувањето.