ОРБАН СЕ ЛУТИ ЗА СТАРТ НА ПРЕГОВОРИ СО УКРАИНА: Тоа е сосема бесмислена oдлука
Објавено во: Свет 14 Декември, 2023
Унгарија е незадоволна затоа што Европската Унија(ЕУ) почна преговори со Украина.
Унгарскиот премиер Виктор Орбан ја напушти просторијата кога лидерите ја носеа одлуката за отворање на пристапните преговори со Украина, потврдија за Гардијан тројца европски дипломати.
Орбан на социјалните мрежи повтори дека Украина не е подготвена да ги започне пристапните преговори.
„Речиси осум часа бевме на преговарачка маса овде во Брисел на самитот. Имавме голема дискусија за членството на Украина во ЕУ. Ставот на Унгарија е јасен: Украина не е подготвена да започне преговори за членство во ЕУ. Тоа е сосема бесмислена, ирационална и погрешна одлука за почеток на преговори со Украина во овие околности“, рече тој.
Кажа дека Унгарија нема да го промени својот став.
„Од друга страна, 26 други земји инсистираа да се донесе оваа одлука. Затоа, Унгарија одлучи да ги остави тие 26 земји да тргнат по својот пат. Унгарија не сака да има удел во оваа лоша одлука и затоа Унгарија денеска не учествуваше во одлуката“, додаде тој.
Украина и Молдавија добија зелено светло за почеток на преговорите, а Грузија доби кандидатски статус.