16 Декември, 2018
0.5568
    ALK 8197.71    -1.16%     FERS 67900    0%     GRNT 800.16    -2.3%     KMB 5024.07    -0.79%     MPT 46679.54    -1.73%     MTUR 4900    0%     OHB 6517    -0.43%     OILK 6000    0%     OKTA 4350    0%     RMDEN12 97.3    0.31%     RMDEN15 96.8    -0.41%     RMDEN16 97    0%     SBT 1950    8.22%     SOLN 170    0%     STB 1281.65    -0.63%     TEL 299.58    -0.14%     TNB 14180    -0.14%     TTK 1270    -0.78%     ZLRB 6170    311.33%

ОРЦЕ КАМЧЕВ: Да нема дилема, јас лично би потпишал ист договор со Грција

Објавено во: Економија 17 Септември, 2018

Тоа е мојот став, не дека нема друга опција, туку таа е единствената опција во која јас верувам. Јас лично ќе се залагам да пројде тој референдум. Тоа се вредности во кои јас верувам и преку кои и државата и сите ние ќе добиеме десеткратно повеќе придобивки од она што го имаме денеска.


Р.Ф. - Престижниот економски магазин во светот „Форбс“ Ве прогласи за најбогат човек во Република Македонија и тоа е големо и светски релевантно признание. Колку трае работниот ден на најбогатиот Македонец?

Камчев: Среќен сум што сум успешен и богат човек и тој успех ме исполнува. Форбс тоа го направи според критериумите кои ги имаат поставено- бизнис, капитал, менаџмент модел и слично . Многу малку се знае дека компанијата е основана пред 30 години, и дека истата е чисто приватна, и не учествувала во процесот на приватизацијата во Република Македонија. Се што е направено е направено фамилијарно од мојот татко, моето семејство, од мене заедно со моите менаџери и вработените и затоа најмногу се гордеам на тоа. Ми значи што како фамилија во континуитет вложуваме во РМ , и продолжуваме да ја развиваме нашата успешна приказна во повеќе сектори. Сигурно не е познат податокот дека на список на нашите компании кои што се поседувани од моето семејство и во кои имаме управувачко влијание, имаме 2976 вработени - бројка која не прави најголем македонски работодавач. Минатата година е исплатена бруто плата од 32 милиони евра или придонеси во државниот буџет околу 12 милиони евра. Тоа се бројки што се факти, а пред фактите и боговите молчат.

Р.Ф. - Што Ве мотивира да работите?

КАМЧЕВ: Сакам да живеам во успешна држава, каде што ќе има среќни луѓе, затоа континуирано ја надоградувам комплетно нашата компанија, инвестирам во сите сектори и се обидувам тоа да биде според модел кој ќе биде поразличен од стереотипите во приватизираните компании, каде голем од нив пропаднаа, со чест на исклучоците каде како посебно позитивен пример би го истакнал Алкалоид. Мојот успех се гледа . Направив гринфилд приказна од една успешна болница. Го имам најмоќниот партнер во регионот , втората светска групација како партнер. Сите пари кои што се заработени од сите трансакции се реинвестирани во РМ во различни сектори , имаме инвестиции и во странство со истите тие партнери и тоа ме прави среќен и тоа сакам да биде мојот живот и животот на моите деца. Сакам да живееме во една стабилна и европска земја, во која младите ќе имаат перспектива и ќе сакаат да живеат во неа, а не како денеска сите да бегаат од истата.

Р.Ф. - Поседувате повеќе успешни компании и сте акционер и сопственик на удели во различни бизниси. Како ги избирате луѓето на кои им делегирате работни задачи, кои карактеристики се најважни за соработниците да ја здобијат вашата доверба?

КАМЧЕВ: Многу е тешко да се најдат успешни менаџери, посебно во различни сектори, кога се работи во однос на здравството, тој систем е поставен и функционира беспрекорно на база на квалитет . Сите се одлично мотивирани, од портир па до највисоката менаџерска позиција . Сите знаат кои се навните работни задачи и обврски, нема импровизација со ништо, сите правила што важат во светските болници важат и во Систина и тоа е клучна работа дека треба да се научиме да го прифатиме европскиот, потврдено успешен начин на работа. Моите партнери од Турција ме научија како тоа функционира и како се работи во развиени системи и тоа ние го имплементиравме во Македонија, од софтверските па до сите можни системи кои постојат. Во земјоделието сфативме дека не знаеме, не разбираме, баравме луѓе во регионот и денеска сме среќни бидејќи имаме менаџери од странство кои што го менаџираат процесот на земјоделие, фармите затоа што во Македонија нема знаење за тој тип на индустрија. Сите мислат дека се знаат, меѓутоа фактите се друго . Бројките кои денеска ги произведува Пелагонија во однос на приноси се на ниво Војводина и Бугарија, значи високи приноси затоа што се инвестирани многу средства и е различен типот од сеење, па до жнеење во целата таа приказна како функционира тој систем. Се надеваме дека во многу блиска иднина ќе го подигнеме тоа ниво на уште еден поголем исчекор, но тоа се дел од деловните тајни .

Р.Ф. - Важите за човек што има извонреден претприемачки дух и знае да се прилагоди на општествено-политички промени. Кога одлучувате за драстични промени дали се водите од лични причини или од тоа што е подобро за бизнисите?

КАМЧЕВ: Ги почитувам исклучиво бизнис принципите. Јас сум бизнисмен и добро знам лично кој сум и што сум, важно ми е бизнисот да биде секогаш во рамките на законските регулативи и да биде почитуван и од општеството, и од Владата и од сите што функционираат во тој систем. Бизнис заедницата е партнер со Владата, а јас ви кажав пред малку дека само 32 милиони евра се исплатени лични доходи на луѓето кои што работат во Македонија и тие пари се внесени во Македонија. Плус по основ на придонеси, на ДДВ, на царини и слично и уште 10 милиони евра пари кои што моите бизниси ги влеале во буџетот на РМ и нормално е секогаш на прво место да ми биде бизнисот. Јас приватно знам кој сум , што сум, кои ми се пријатели и тоа е дел од мојот живот кои исто така грижливо го негувам.

Р.Ф. - Како се справувате со стресот од работата?

КАМЧЕВ: Како млад се нервирав повеќе, сега отрпнав на се (се смее) . Ако денот нема стрес ми е чудно бидејќи живееме и работиме во Македонија . Работиме во средина каде што има многу малку професионалци, многу често работат аматери и импровизатори во повеќе сегменти и делови од општеството и секогаш кога сакате да ги поставите идеално работите од другата страна доста често се соочувате со сериозни не знаења и проблеми и тоа најмногу ми предизвикува стрес . Не сум тип на менаџер кој сака да казнува и санкционира , коректен сум со вработените . Поретко излегувам (се смее) се согласно со годините, сега повеќе спортувам и со шетање надвор од државата се релаксирам.

Р.Ф. - Важите за боем, човек за кој многу се зборува, и човек за кој има многу озборувања. Дали се доживувате како хедонист и како се справувате со озборувањата?

КАМЧЕВ: Тоа не можам да го сменам. Живееме во мала средина, тешко е да се одбраните од лагите покрај денес модерните социјалните мрежи каде секој може да
напише се, и не можете да се одбраните од лагата. Десет пати кажана лага станува вистина кога тоа се споделува. Јас немам Фејсбук, не користам социјални мрежи, со единствена цел да го заштитам мозокот од напливот на непотребни информации од кој најголемиот дел се невистинити. Во еден период дел од неточните озборувања негативно влијаеа врз мене и ми правеа нервоза, но сега веќе таквиот проблем го надминав и проблемите од тој тип неме не ме тангираат.

Р.Ф. - Бевте многу близок со Сашо Мијалков со кого имавте бизнис релации, заеднички вложувања кои беа крунисани и со кумска врска. Во последниот период од година и половина сведоци сме на промени во акционерски структури кај некои компании во кои бевте акционери преку вашите друштва. Дали е точно дека вашите персонални релации се променети и дали причините се деловни или се од лична природа?

КАМЧЕВ: Најпрво да разјасниме, директни бизнис релации со Сашо Мијалков додека бил функциониер сум немал никогаш, тоа го гарантирам и стојам позади тоа што го зборувам. Ниту денеска имам такви бизнис релации , доколку има некој акции, некои негови фирми, од неговите деца во некои акционерски друштва, јас тоа не можам да го забранам бидејќи има илјадници акционери, меѓутоа во управувачка структура, во структура која е управувачки одбор или слично тело немаме такви релации. Точно е дека бевме пријатели, повеќе не сме пријатели, а причините се различни во однос на тоа што се шпекулациите, но тоа останува меѓу нас двајцата .

Р.Ф. - Карактеристика која Вас и вашето семејство го прави уникатно, а која е помалку позната за јавноста е тоа што сопственичката структура на неколку ваши компании завршува во сопствеништво на една компанија во која сопственик е вашата мајка. Тоа е во согласност со традицијата, високо почитување на семејни вредности, доброто домашно воспитание или има врска и со одлучувањето за одредени ситуации?

КАМЧЕВ: Пред 30 години кога е основана „Орка Холдинг“ сопственик беше мојот покоен татко , потоа во некои управувачки структури бевме јас и сестра ми и денеска сме извршни директори во компаниите меѓутоа сопственик на капиталот е нашата мајка. Таа е пензионерка, нема никаква извршна функција ниту пак носи одлуки.

Мојата сестра е извршен директор на „Здравје Радово“ и таа ги води хотелските и другите бизниси во групацијата за кои сама си одлучува, но нормално е дека за покрупни одлуки во компанијата се консултираме и на ниво на семејство и на ниво на Управен одбор, и секако го земаме предвид мислењето на менаџерите, бидејќи семејството не ја носи главната одлука индивидуално. „Орка Холдинг“ денеска не функционира како фамилијарна компанија . Мојата идеја е за одреден период од три, четири години јавно да ја изложам на берза компанијата , да го резлизирам првото сериозно IPO и да направам корпоративна структура која нема да зависи од фамилијата . Многу работи во Македонија направив прв, а ќе го направам и тоа затоа што во еден период од неколку години ќе морам и јас да се повлечам од извршната функција и да одам во борд како што е тоа еден нормален процес во сите компании на Запад.

Р.Ф. - Дали договорот со Грција, референдумот и промената на уставното име се важни за бизнисот и за општественото живеење? Дали тоа ќе ги промени условите за живот во Македонија и како ќе влијае?

КАМЧЕВ: Изгубивме премногу време последниве 27 години со историски глупости, со митови и легенди кои ни создадоа проблеми не само со сите наши комшии но и со самите нас, во нашата држава. Неможноста да се реши спорот со Грција не извади од шансата да бидеме веќе одамна и во Нато и во ЕУ и поверувјте ми Македонија немаше да биде во таа ситуација во која сме денеска ни економски ни политички. Затоа, Јасно и гласно ќе го кажам мојот став , мислам дека ниту ќе имаме подобра шанса, ниту дека сме имале похрабар лидер од премиерот Заев. Јас лично сум ЗА договорот со Грција, како и бев ЗА Договорот со Бугарија.Јас сум европски и светски човек и сакам Македонија да биде дел од таа структура. Сакам да живеам во Република Македонија различна од таа што е денеска, сакам да бидеме членка на НАТО и ќе направам се што е во моја можност...

... Тоа се вредности во кои сите ние ќе добиеме десет пати повеќе придобивки од она што го имаме денеска. Се тоа не го кажувам само јас, ниту само Заев, тоа ни го кажа целиот свет! Светски лидери како Меркел, Курц и Могерини кои дури дојдоа на крај кај нас, Државниот департамент, дури и Русија го поздрави договорот иако на некои им се сака да е е така. 

Со влезот во новото друштво ќе бидеме приморани да почнеме да размислуваме и функционираме европски. Правилата на игра ќе бидат јасно дефинирани, нема злоупотреба на работници, се знае кога е годишен одмор, се знае кога е време за
јадење, што е превоз, како и кога се користи заштитна униформа. Се знаат стандарди по кои мора да фунцкионираат сите компании, а не како досега. Тоа ќе не научат и сум сигурен во тоа. Тоа е мојот став, не дека нема друга опција, туку таа е единствената опција во која јас верувам. Јас лично ќе се залагам да пројде тој референдум. Тоа се вредности во кои јас верувам и преку кои и државата и сите ние ќе добиеме десеткратно повеќе придобивки од она што го имаме денеска.

Р.Ф. - Имате бизниси, меѓу другото и во Бугарија – членка на Европската Унија. Зошто одлучивте да инвестирате таму и како се води бизнис со таа земја членка на Унијата? Од бизнис аспект одат ли таму работите на подобро по нивниот прием во ЕУ?

КАМЧЕВ: За мене Бугарија е најубавата и најблиска земја и народ од сите овие локални наши земјиВидете сега се што има Бугарија која што е членка на Европска унија. Незнам колку нови тунели, железници , инфраструктура, патиштата се прават ... а ние денеска сме последна земја од Европската унија. Бојко Борисов и Зоран Заев имаа храброста да го решат брзо вештачкото неразбирање што го имавме од повеќе од деценија и го потпишаа минатата година договорот за Пријателство. Тоа беше клучно и ни даде шанса да направиме компромис и со Грција. Затоа мора да имаме успешен референдум , ако не се решиме денеска, утре нема да не биде, и тоа треба да им стане јасно на сите.

Р.Ф. - Како се води бизнис во Бугарија како земја членка на Унијата? Од бизнис аспект одат ли таму работите на подобро по нивниот прием во ЕУ?

КАМЧЕВ: Само споредете го нашето здравство со здравството во Бугарија. Тие се 30 години пред нас. Ние сеуште немаме никаква стратегија. 28 години откако сме независни во континуитет тој сегмент пропаѓа. Ние денеска сме во ситуација каде што ни умираат деца од две години од сепса. Да не зборувам за милион гафови што се случија од пред пет шест години до денес во однос на смртноста . Ако влезете во македонските државни болници како да сте влегле во Индија . Ние збориме и се фалиме дека сме исчистиле ѓубре , наместо да зборуваме за опрерациони сали. 

Во Бугарија веќе нема приватни и државни болници . Болниците се јавни , капиталот е приватен или државен , сосема различно. Не може кој каде му текне да отвори болница. Здравствениот фонд по истите цени ги покрива услугите и во јавното и во приватното здравство. Генерално се стандардизирани работите, а кој сака да се оперира кај одреден професор, во сабота или недела, самиот си доплаќа. Поставени се правилата на игра .

Исто важи и за земјоделските европски субвенции , ние денес мака мачиме со окрупнување , приватизација или со финансирање на земјоделието . Бугарија и во овој сегмент е многу понапред од нас.

Р.Ф. - Работата на Фондацијата Илија Камчев беше многу добра општествено- корисна практика чиј иницијатор е вашето семејство, а Вие сте нејзин претседател. Од достапните јавни податоци се гледа дека последните конкурси за аплицирање се од 2015 година. Го променивте начинот на делување или има мораториум во работењето на фондацијата?

КАМЧЕВ: Фондацијата функционира со најголем буџет во Република Македонија . Таа го изгради пешачкиот мост на реката Вардар, инвестиција околу 1 милион евра и досега имаме стипендирано 14 доктори кои што се во фаза на специјализација. Првите два турнуси беа во областа на кардиохирургија и анестезија, односно во делови кои се дефицитарни за Македонија , што ги немаше во македонското здравство, а сега се од различни профили во медицината.

Ние ги вршиме работите, не се фалиме, не нѐ интересира да промовираме што сме направиле, туку ни е важно да помогнеме. Иако маркетиншки многу слабо сме се изрекламирале, ефектите и резултатите од нашето општествено одговорно дејствување се видливи и најзначајно најдобро ги знаат оние кои ги почувствувале.


А.М.

Забрането е копирање на содржината. Пренесување на дел од истата е дозволено само до 30 отсто со хиперлинк.

Можеби ќе ве интересира

Колку пари вртат адвокатите кои бранат обвинети од СЈО?

Колку пари вртат адвокатите кои бранат обвинети од СЈО?

Во иднина ќе нема кој да им намести плочки, цевки и плакари на Македонците

Во иднина ќе нема кој да им намести плочки, цевки и плакари на Македонците

Самсоненко ќе финансира и понатаму, барем засега

Самсоненко ќе финансира и понатаму, барем засега

Само мал дел македонски трговски марки ќе бидат опфатени од Преспанскиот договор

Само мал дел македонски трговски марки ќе бидат опфатени од Преспанскиот договор

Цената на нафтата ги изненади сите

Цената на нафтата ги изненади сите

НЕ Е САМО ГЕРМАНИЈА: И оваа земја е економска сила во ЕУ

НЕ Е САМО ГЕРМАНИЈА: И оваа земја е економска сила во ЕУ

МОДНИОТ ГИГАНТ ГО ОДВРЗА ЌЕСЕТО: Во каков бизнис влегува „Луј Витон“

МОДНИОТ ГИГАНТ ГО ОДВРЗА ЌЕСЕТО: Во каков бизнис влегува „Луј Витон“

Фолксваген и Бош бараат и неквалификувани работници од Македонија

Фолксваген и Бош бараат и неквалификувани работници од Македонија

Владата се смилува, ќе одвои повеќе пари за почист воздух

Владата се смилува, ќе одвои повеќе пари за почист воздух