Откриено e огромно наоѓалиште на нафта и гас

Добивај вести на Viber

Британската енергетска компанија БП го откри најголемото нафтено и гасно поле во последните 25 години. Полето се наоѓа во басенот Сантос, во длабоки води на 400 километри од источниот брег на Бразил.

Како што објави Би-Би-Си, ова откритие потврдува дека компанијата се враќа на фосилните горива, нејзините традиционални извори на профит, по неколкугодишни обиди за премин кон обновливи извори на енергија.

Извршниот потпретседател на компанијата, Гордон Бирел, изјави дека ова е „најголемото откритие на БП во овој век“ и додаде дека се разгледува изградба на нов производствен центар во регионот.

По оваа вест, акциите на компанијата на Лондонската берза пораснаа за малку повеќе од еден процент.

Оваа година, БП откри и нови полиња во Мексиканскиот Залив и Египет.

„Ова е уште еден успех во исклучителна година за нашиот истражувачки тим“, рече Бирел.

На крајот на февруари, БП ги намали планираните инвестиции во обновливи извори на енергија и во исто време издвои дополнителни средства за нафтени и гасни постројки - потег што пазарот го толкува како обид за стабилизација по турбулентни години.

Во 2020 година, пандемијата ја турна компанијата во загуба од 5,7 милијарди долари, додека во 2022 година, БП претрпе дополнителни 25 милијарди долари загуба поради повлекувањето од руските енергетски проекти по почетокот на војната во Украина. Во меѓувреме, конкурентите кои останаа фокусирани на фосилните горива остварија рекордни профити.

foto EPA/ADAM VAUGHAN