Паднати оџаци, испукани ѕидови, ресенчани почнаа да ги пријавуваат штетите

Добивај вести на Viber

Жителите на градот Ресен и околните села почнаа да ги пријавуваат штетите од земјотресите во општината.

На првиот ден откако стартуваше пријавувањето, поднесени се десетина барања, а рокот трае до 27 месецов. Граѓаните кои се обратиле до општината пријавиле штети на различни типови објекти, од домови, стари градби до магацини. Од локалната самоуправа велат дека и ден пред да почне пријавувањето, граѓаните се јавувале, прашувале, се интересирале за постапката.

„Потребно е имотот да е на нивно име за да пријават штета, да приложат имотен лист, копија од лична карта и трансакциска сметка. Пријавија штети луѓе од градот и од селата кои се блиску до границата со Грција.  Како ќе биде идните денови, останува да видиме. По неколку дена ќе имаме повеќе детали за штетите“, велат од Општина Ресен.

Жителите на Ресен велат дека иако се трудат да бидат смирени, сепак земјотресите не им даваат мир во овие студени зимски денови. Веќе неколку дена има земјотреси во овој дел од Македонија и во соседна Грција.

„Ние од Ресен и Преспа сме трпеливи луѓе по менталитет, но навистина луѓето се вознемирени затоа што веќе четири дена тресат земјотреси. Се случија земјотреси во текот на ноќта, но и дење. Имаше неколку куќи каде од силниот земјотрес паднаа оџаци, напукнаа ѕидови, и тоа се претежно постари куќи, или куќи каде не живее никој. Силниот земјотрес ако потраеше малку повеќе, сега ќе имаше поголеми материјални штети. Ваков силен земјотрес имаше во 1994 година, а послаби земјотреси се случувале и претходните години“, објаснува Љубе Пампулески, жител на Ресен.

Билсер Нефаил од Ресен објаснува дека силниот потрес со јачина од над 5 степени траел 10 секунди, се слушало крцкање, и делови од мебелот се поместувале.

„Не спиеме мирно сега. Конкретно на мојата куќа нема штети. Силниот земјотрес беше страшен. Имам една столна ламба и таа се поместуваше лево – десно. Го паметам и земјотресот од 1 септември 1994 година, затоа што тогаш полагав за возачка, и буквално дрвјата почнаа да се нишаат. Возев со страв тој ден, но го положив возачкиот испит“, вели Нефаил.

Пријавувањето на штетите може да се изврши секој работен ден од 9 до 15 часот. Барањето за пријавување штета граѓаните може да го добијат во Општина Ресен или на веб страницата www.resen.gov.mk. Врз основа на доставените барања, Комисијата од Општина Ресен, ќе изврши проценка на настанатите штети на терен по што ќе биде соодветно постапено.

Сања Атанасовска

foto North Macedonia Timeless