ПАПАТА ЛАВ XIV ИМА ПРАВО НА ПЛАТА ОД 2.500 ЕВРА, ЌЕ СЕ ОТКАЖЕ ЛИ ОД ПРИХОДОТ? Ватикан ги покрива сите негови трошоци за живот

Добивај вести на Viber

Папата Лав XIV, новиот поглавар на Католичката црква и првиот Американец што ја имал таа позиција во историјата, не добива традиционална плата. Иако тој води повеќе од милијарда верници и управува со суверена држава, Ватикан му обезбедува живот без никакви лични трошоци.

Најмалата независна држава во светот се грижи за секој аспект од животот на папата, од сместување и храна до здравствена заштита, транспорт и осигурување.

Иако технички е наведено дека поглаварот на Католичката црква би можел да има право на месечна плата од околу 2.500 евра, во реалноста повеќето папи се откажуваат од личниот доход. Покојниот папа Франциско одбил каква било лична плата во текот на целиот свој понтификат, а наместо луксуз, го избрал животот во скромниот ватикански пансион Домус Санкте Мартае, пишува Дејли меил.

Пред неговиот избор за папа, кардиналот Роберт Превост наводно добивал месечен надоместок од 4.000 до 5.000 евра, што била стандардна плата за кардиналите. Но, неговиот нов живот не вклучува финансиска компензација бидејќи Ватикан покрива сè.

Папата Лав XIV, кој потекнува од Чикаго, е познат по својата отвореност кон маргинализираните групи и неговиот умерен став, што го става во континуитет со реформистичкиот дух на неговиот претходник. Неговиот избор на име - Лав XIV. – исто така носи симболика. Историски гледано, папите со тоа име биле познати по социјалните реформи и цврстото лидерство во време на криза, а Превост со тоа испратил јасна порака за насоката што сака да ја земе.