Пеце Грујовски: Административците што ќе одат во приватно ќе добијат гаранции
Објавено во: Економија 01 Октомври, 2019
Лидерот на Синдикатот на работниците од управата, правосудните органи и здруженија на граѓани на РМ (УПОЗ), Пеце Грујовски, денеска изјави дека административците кои преку државно субвенционирање ќе одат да работат во приватниот сектор ќе добијат и гаранции кога ќе го прифатат новото работно место.
Засега нема детали како би се одвивал целиот процес, а се останува засега на најавите на министерот за информатичко општество и администрација Дамјан Манчевски.
Од УПОЗ тврдат дека добиле уверување од надлежните оти целиот процес ќе се одвива како што велат од таму „безболно“, иако за сега нема ништо за начинот и времето на спроведувањето на оваа реформа што подолго време ја најавува Владата.
„Нема да бидат понудени на приватниот сектор неработниците туку оние кои се незадоволни од платите, но се предвидува да се бара гаранција од приватникот за висината на платата и други гаранции“ вели првиот синдикалец Грујовски за Алфа ТВ.
Приватниците кои ќе преземат административци би добиле субвенции, а државата би ја плаќала и нивната преквалификација, според она што е засега познато.