Пекол во Саудиска Арабија: Над 500 мртви аџии во Мека, температури достигнуваат и до 52 степени
Објавено во: Свет 19 Јуни, 2024
Над 500 луѓе починаа поради болести предизвикани од високите горештини за време на аџилакот на муслиманските верници во Мека! Како што пренесуваат странските медиуми, температурата во Саудиска Арабија во последните денови достигнала и до 52 Целзиусови степени.
Трагедијата го наруши празникот Курбан Бајрам, еден од најголемите муслимански празници. Мека секоја година прима милиони посетители за годишниот исламски аџилак во Каба, кој е познат и како Куќа на Алах.
Овогодинешните церемонии се одржаа на пеколни температури. Во Големата џамија се измерени рекордни 51,8 степени според саудискиот метеоролошки центар.
Дипломатите соопштија дека бројот на загинати во мртовечницата Ал Муаисем достигна 550, од кои повеќето се од Египет.
„Повеќето од загинатите се Египќани“, изјави арапски дипломат за АФП.
More than 500 people have been killed during the annual Muslim pilgrimage to Mecca as temperatures exceed 50 degrees Celsius and cause heat-related illnesses.https://t.co/9rkSud6RIv
— Sky News Australia (@SkyNewsAust) June 19, 2024
Верниците се обиделе да се разладат со полевање со вода. Според извештаите на судските медиуми, загинале 323 државјани на Египет, 60 државјани на Јордан, 35 државјани на Тунис, 11 државјани на Иран и еден државјанин на Сенегал. Националноста на другиот починат не е соопштена.
За време на хаџот, повеќе од 390.000 аџии побарале лекарска помош поради преголемата топлина. Очевидци наведуваат дека покрај патот виделе многу неподвижни тела на верници, не знаат дали починале.
„Ќе ги засилиме напорите да се грижиме за сите на кои им е потребна помош“, соопшти саудиската Црвена полумесечина, додавајќи:
„Планот е да се фокусираме на верниците кои го завршиле хаџот и пред да стигнат до болницата. Подготвивме 45 целосно опремени медицински центри со 700 професионални работници и над 500 волонтери.
И покрај големиот број смртни случаи, саудискиот министер за здравство Фахд Абдул Рахман Ал Џалаџаел изјави дека здравствените служби направиле одлична работа за време на овогодинешниот хаџ.
„Благодарение на Алах, неговото височество принцот и премиерот со задоволство објавуваат успешно спроведување на плановите поврзани со здравствените услуги за време на оваа сезона на Хаџ“, рече тој.
Одењето на хаџ барем еднаш во животот се смета за една од обврските на секој муслиман кој е способен (финансиски и физички) да го стори тоа.
„Хаџилук е тешка задача. Мора да се вложат големи напори ритуалот да се изврши и во услови на голема топлина и гужва“, вели еден од верниците.
Властите ги предупредија верниците да избегнуваат да бидат на отворено помеѓу 11 и 15 часот. Се проценува дека оваа година Мека ја посетиле околу 1,8 милиони муслимани од целиот свет. Минатата година за време на хаџот загинаа најмалку 240 луѓе, а повеќе од 10.000 верници побараа помош поради големите горештини.
Фото: Принтскрин/Јутуб