Пендаровски: Договорот со Бугарија го постигнавме полесно од „преспанскиот“, но имплементацијата ќе оди потешко

Добивај вести на Viber

Претседателот на Македонија, Стево Пендаровски, во своето обраќање до македонските амбасадори како гостин кај министерот за надворешни работи Никола Димитров, рече дека договорот за добрососедство со Бугарија бил постигнат многу побрзо и полесно од „преспанскиот“ со Грција, но неговата имплементација очекува да се одвива доста потешко.

„ Имплементацијата на договорот со Бугарија ќе оди потешко, иако полесно беше постигнат отколку оној со Грција. Во работата на комисиите на историчари има политички влијанија. Околностите и амбиентот не е таков како пред пет-шест месеци. Но, ние ќе создадеме амбиент тој да се постигне. Не смееме да пропуштиме било што во тие преговори кои се многу битни. Тоа што ќе го потпишеме треба да трае, не треба ад-хок решение кое ќе се сруши. “, рече Пендаровски.

Шефот на државата за внатрешните попречувања рече дека случајот „Рекет“ не може да го попречи патот на евроинтеграциите на Македонија и доделувањето на датум за преговори од ЕУ во октомври, но дека и понатаму ќе има предизвици.

„Не значи дека по датумот некоја од земјите членки не може да не блокира додека траат преговорите. Тоа може да се случи по само неколку месеци“, истакна Пендаровски.

Додаде дека во моментов земјата има испразнети 26 амбасадорски позиции во дипломатските преставништва.

„Во завршна фаза сме со министерот Димитров да ги преполовиме испразнетите места. Околу 15 или 16 позиции ќе решиме овој или следниот месец. Некои позиции во некои амбасади се затвораат поради тоа што не се исполнија очекувањата. Наместо тоа, ќе ги засилиме персоналот во други амбасади“, најави тој.