Пендаровски: Имаме седум народи во Уставот, проблем ли е да ставиме уште шест?
Објавено во: Македонија 01 Септември, 2023
Шефот на државата, Стево Пендаровски верува во членство во ЕУ пред 2030-та ако нема опструкции од ВМРО-ДПМНЕ.
Тој вели дека е реално Македонија да стане членка на ЕУ во 2030, па дури и порано, доколку опозицијата го одблокира процесот. Според него, потврда за тоа се изјавите кои доаѓаат од блиските соработници на францускиот претседател Емануел Макрон и од врвот на Европската Унија.
„Без внатрешни опструкции какви што гледаме за жал од македонската опозиција, можно е и пред тој рок и за тоа потврда и е госпоѓата министерка за Европа на Франција која рече дека може некои од државите на Западен Балкан да влезат пред 2030 година“, кажа Пендаровски.
Пендаровски не гледа ништо спорно во изјавите на Макрон за Европа со повеке брзини. Кажа дека тие погрешно се интерпретираат во јавноста заради добивање политички поени.
„Ниту еден од европските официјални лица не рекол дека Западен Балкан нема да влезе, ниту една од шесте држави додека ние внатрешно не се доуредиме“, рече претседателот.
Вели дека идејата на Макрон за реформи во ЕУ е стара и е позната.
„Имаме седум народи во Уставот, проблем ли е да ставиме уште шест. Како тоа ќе ја загрози Македонија. Ако имаш политички причини, чекајќи ги следните избори за да дојдеш на власт, а потоа да му ја мислиш за Европа и две-третини Устав, тоа е друга работа“, изјави Пендаровски.
Макрон во неодамнешниот говор пред амбасадорите во Париз ја реактивираше идејата дека без внатрешни реформи Унијата не може да се проширува. Франција и Холандија претходно имаа резерва за проширувањето на ЕУ. Опозицијата кај нас тврди дека нема да поддржи уставни измени и бара брзи избори. Tие се против внесувањето на Бугарите во Уставот. Претходно, имаше најави од европски политичари дека ако Македонија не го реализира ветеното, Албанија сама ќе продолжи кон ЕУ.
фото Фејсбук/Стево Пендаровски