ПОЧНА ИСТОРИСКАТА СРЕДБА НА ПУТИН И ЕРДОГАН: Нов период во односите меѓу Русија и Турција
Објавено во: Балкан 09 Август, 2016
Долгоочекуваната средба меѓу рускиот претседател Владимир Путин и неговиот турски колега Реџеп Таип Ердоган започна во Константиновската палата во Санкт Петербург, по речиси една година студени односи меѓу двете земји. Двајцата лидери планираат да продолжат со билатералните односи, кои беа затегнати поради соборениот руски бомбандер во ноември минатата година.
Претседателот на Русија Владимир Путин изјави за време на средбата дека двете земји се потпираат на обновувањето на односите. „Ние сите сакаме да продолжиме со дијалогот меѓу себе и односите во името на интересите на рускиот и турскиот народ“, коментира тој, цитиран од ТААС.
Неговиот турски колега истакна дека соработката меѓу двете држави ќе придонесе за решавање на голем број регионални проблеми.
Путин го потврди ставот на Москва против неуставните активности во врска со обидот за државен удар во Турција.
„Ние секогаш и категорично сме биле против сличните обиди за неуставни активности. Во овој контекст сакам да изразам надеж дека под ваше раководство турскиот народ ќе се справи со овој проблем и редот и уставната одговорност ќе бидат вратени“, коментира рускиот претседател.
За возврат Ердоган се заблагодари за одвоеното време на Владимир Путин по обидот за преврат.
„Билатералните односи преживеале многу. А од политичка гледна точка целиот регион очекува многу од нас двајцата“, истакна турскиот претседател.
Двајцата лидери ќе разговараат за реконструкција на заладените односи меѓу двете земји, економските врски, како и борбата против тероризмот.
Потсетуваме дека кризата предизвика губење на турската економија од 13 милијарди долари.