Добивај вести на Viber
Туристичката сезона во Хрватска годинава потфрли, призна министерот за финансии Борис Лаловац. Како првенствена причина за ова тој ги наведе лошите временски услови, но и промашената туристичка стратегија.
Огромното потфрлање на туристичката сезона предизвика силен удар на хрватскиот државен буџет, кој во голема мера се потпира врз приходите на туризмот. Затоа Владата е принудена да ги забрза плановите за ребаланс.
Според Лаловац, со ребалансот ќе бидат опфатени сите, па и вработените во јавниот сектор. Сепак, тој повтори дека не се откажува од укинување на највисоката стапка на данокот на доход. Предлогот кој хрватскиот министер за финансии веќе го изложил пред потесниот владин кабинет, го смета за клучен за придвижување на одреден дел на потрошувачката и стимулирање на граѓаните повеќе да работат и за тоа да не бидат казнети.
„Сите досегашни анализи покажуваат дека тоа би можел да биде добар инструмент за поттикнување на потрошувачката, а секако претставува и олеснување за домашниот буџет на граѓаните, кои за жал со високи даноци во Хрватска се дестимулирани да работат. Сакам да кажам - луѓе, работете и за тоа нема да ве казнуваме! Колку повеќе работите, толку помали ќе бидат даноците“, порача Лаловац.