ПОВЛЕКУВАЊЕ ДЕПОЗИТИ: Кризата направи беља, ама најлошото заврши!

Добивај вести на Viber

Граѓаните и компаниите во април од штедните книшки во банките повлекле 108,6 милиони евра, покажуваат најновите податоци на Народната банка. Најголем дел од овие парите, или 62,8 милиони евра повлекле граѓаните намалувајќи ги депозитите и во денари и во странска валута. Фирмите пак повлекле 42 милиони евра, но тие ги намалите заштедите во денари, а ги зголемиле во странска валута. Останатата сума од нешто помалку од 4 милиони евра се повлекувања од други институции. Овие повлекувања се направени во периодот кога настана паника кај населението и компаниите, поради продлабочувањето на политичката криза по што се вадеа парите од штедните книшки, а дел од банкарите брифираа дека оние кои имале поголеми суми, парите ги ставале во сефови во банките. Сега состојбата е стабилизирана, но оние кои ги извадија парите од штедните книшки, загубиле 4 милиони евра на камати. „Речиси целосно е запрено повлекувањето на депозитите од банките. Во изминатите две недели, ситуацијата се стабилизира, а повлекувањето на депозитите речиси запре. Има показатели дека граѓаните ги враќаат депозитите во банките, поради што сметаме дека најлошото заврши“,изјави гувернерот на НБРМ Димитар Богов. Во април штедните влогови изнесуваат 4,85 милијарди евра Практично, на крајот на април, на штедните книшки граѓаните и фирмите имаат сума од 4,84 милијарди евра, додека на крајот на март имале сума од 4,95 милијарди евра. Тоа е 108, 6 милиони евра помалку. При тоа, за 124 милиони евра се намалени штедните влогови во денари, а за 16 милиони евра се зголемени штедните влогови во странска валута. Заштедата во денари на крајот на април изнесува 2,81 милијарди евра, или 124 милиони евра помалку од март, кога изнесувале 2,93 милијарди евра. А, заштедата во странска валута изнесува 2,03 милијарди евра, или 16 милиони евра повеќе од март, кога изнесувале 2,01 милијарди евра. Граѓаните од банките повлекле 62,8 милиони евра Најголем дел од парите ги повлекле граѓаните. Односно, граѓаните од штедните книшки повлекле 62,8 милиони евра. Па така, во април граѓаните на штедните книшки имаат сума од 3,41 милијарда евра, додека на крајот на март имале сума од 3,47 милијарди евра. При тоа, намалувањето е и кај депозитите во денари, но и кај депозитите во странска валута. Компаниите од банките повлекле 42 милиони евра Компаниите пак повлекле сума од 42 милиони евра. Па така, штедните влогови на компаниите во април изнесуваат 1,09 милијарди евра, додека во март биле 1,14 милијарди евра. При тоа, кај компнаиите може да се забележи дека денарските депозити ги намалиле за сума од 63 милиони евра, но истовремено ги зголемиле депозитите во странска валута за износ 21,3 милиони евра.