ПОВТОРНО ДИШЕМЕ ЗАГАДЕН ВОЗДУХ: Колку далеку може ветерот да ги однесе ПМ 10 честичките?
Објавено во: Македонија 02 Декември, 2023
Високото аерозагадување повторно е актуелно. Ветерот може да
ги носи ПМ честичките на голема
далечина. Oвие честички долго
време остануваат во воздухот.
„ПМ 10 честичките можат да останат со часови во воздухот и да се пренесат до некаде 50-ина километри. Но, ПМ 2.5 честичките кои се многу поопасни, можат да останат во воздухот долго време, до неколку недели и да се пренесат на стотици до илјадници километри од изворот. Што значи, да, силниот ветер ги носи ПМ честичките од урбана во рурална средина, но и обратно. Колку ќе се пренесе таа загаденост зависи од повеќе фактори. Ако ветерот е силен, ќе ги дисперзира на поголема површина и концентрацијата ќе се намали значително, до степен каде загаденоста е незначителна, ако има дожд, ќе ги спушти на земја и нема да се пренесат понатаму, а ако има магла и нема движење во воздухот, ќе останат во градот“, вели Татјана Чакулев од О2 Иницијатива.
Граѓаните сметаат дека поодалечените села кои се на поголема надморска височина имаат почист воздух за разлика од оние кои се блиску до градовите.
„Во Брвеница на пример е загадено и се чувствува при дишење. Вратница е подалеку од градот, на 22 километри оддалеченост, на високо е и тука воздухот е почист. За греење, луѓето се греат на дрва, струја, пелети, секој различно“, вели Ненад Ј. жител на тетовско.
Некои луѓе раскажуваат дека викендите ги поминуваат во село, за да избегаат од урбаните средини каде тешко се дише.
„Јас за викенди сум во кумановското село Речица. Не сум почувствувал дека воздухот е загаден. Мене ми е пријатно таму. Во близина немаме некоја депонија да гори, а оние села каде има депонии, ако често ги палат, веројатно воздухот е загаден“, објаснува кумановец.
Скопје повторно е високо рангиран на листата на најзагадени градови во светот. Синоќа по 21 часот, на листата на air visual беше на 8-то место. По 21 часот синоќа, воздухот во Струмица беше многу високо загаден.
Сања Атанасовска
foto freepik.com/tridsanu1984