Познат производител на мобилни телефони планира да влезе на автомобилскиот пазар: Тесла и БЈД добиваат сериозна конкуренција

Добивај вести на Viber

Xiaomi, глобално препознатлив по своите паметни телефони, до 2027 година подготвува голем исчекор на европскиот пазар на електрични автомобили, влегувајќи во директна конкуренција со Tesla и BYD. Само две години по претставувањето на својот прв автомобил, кинескиот технолошки гигант веќе бележи значаен успех со двата модели – електричниот седан SU7 и спортско-теренското возило YU7, кои освоија и клиенти и критичари на домашниот пазар, а сега се насочуваат кон Западна Европа.

На последната конференција за инвеститори, претседателот на Xiaomi, Лу Вајбинг, најави дека Европа е следната цел во глобалната експанзија на компанијата. Очекувањата се автомобилската дивизија да почне да остварува профит уште во втората половина на 2025 година – проекција која изгледа реална со оглед на бројките: само во вториот квартал од оваа година испорачани се повеќе од 81.000 возила, а вкупниот број во првото полугодие достигна 157.000. Побарувачката во Кина е толку висока што дел од купувачите чекаат испорака подолга од една година, што дополнително ја нагласува силата на брендот.

Иако компанијата сè уште работи со загуба – околу 300 милиони јуани, односно приближно 36 милиони евра во последниот квартал – во Xiaomi веруваат дека зголеменото производство и настапот во Европа ќе донесат пресвртница. Паралелно, се воспоставува и нов истражувачко-развоен центар на Стариот континент, во кој се вклучени поранешни експерти од BMW и инженери од Формула 1. Меѓу нив се издвојуваат Рудолф Дитрих, со искуство во тимовите на Вилијамс и Заубер, како и Душан Шарац и Јанис Хелвиг, двајцата со богата кариера во BMW.