Пратеникот Алими ќе биде приведен доколку не дојде на следното рочиште

Добивај вести на Viber

Пратеникот Ејуп Алими ќе биде приведен доколку не присуствува на следното судско рочиште кое денеска се одложи откако собранискиот спикер Талат Џафери го оправда неговото отсуство, според најавите на претседателката на Судечкиот совет, Марија Клетничка Марковска, во случајот „Титаник 3“.

Главната расправа за судскиот предмет денеска беше одложена за 13 септември поради отсуство на обвинетиот Алими, откако претседателот на Собранието, Талат Џафери го известил судот дека тој во својство на пратеник и координатор на ДУИ учествува во работата на редовните координативни средби кои се одржуваат секој понеделник.

Судијката Клетничка Марковска додала дека на обвинетиот ќе му се достави покана на домашна адреса и на работно место на која ќе пишува „задолжително присуство со приведување“ што би значело дека доколку тој не се појави на следното закажано рочиште, со полиција ќе биде спроведен во судот.

На денешното рочиште за предметот на СЈО, „Титаник 3“, требаше да бидат испитани обвинетите Исмет Гури и Ејуп Алими, кој не се појави на судењето. Клетничка Марковска констатира дека и минатото рочиште се одржало во понеделник, а терминот бил претходно даден. Судот даде пауза од 15 минути за да одлучи што понатаму. На претходното рочиште адвокатите побараа изземање на обвинителите, но не го добија.

Во третиот „Титаник“ на СЈО обвинети се пратеникот на ДУИ, Ејуп Алими и Исмет Гури, заменик-директорот на УЈП Скопје. Како членови на општинската изборна комисија во Чаир на локалните избори во 2013 година, тие уништиле изборен материјал. Според обвинението, Алими и Гури влијаеле директно врз изборниот резултат и ја фалсификувале изборната волја на граѓаните на Чаир за да остварат политичка моќ. Првото рочиште за предметот се одржа на 16 март 2018 година.