ПРАВЕЛЕ ЛАЖНИ ФАКТУРИ, СИ ПЛАЌАЛЕ КИРИИ МЕЃУ СЕБЕ: Што најде ФИТР пред да згасне и да ги даде надлежностите на новата агенција ИНОВА

Добивај вести на Viber

Девет нови компании ќе заработат кривични пријави, под сомнеж за испраќање лажни фактури – една во сметководство, друга во ревизија, трета во Фондот за иновации и технолошки развој, дознава Фактор. Дел од овие фирми, според нашите информации, меѓусебно си наплаќале кирии, користеле исти софтвери и исти алатки, а предметите веќе се подготвени за пријава. Има и компании кои зеле државни пари преку ФИТР, а кои се под ревизија.

Овие наводи го означија и крајот на Фондот за иновации, чии надлежности од вчера се под капата на новоформираната Агенција за иновации, научно-технолошки развој и претприемништво.

Последниот директор на Фондот, Никола Додов, лани обвини дека буџетот на ФИТР бил оштетен за 3,2 милиони денари од компании кои добивале грантови за фиктивни, но и неуспешни проекти, а предмет на истрага биле 60 компании. Сега, во изјава за Фактор вели дека веќе почнале да се наплаќаат парите преку извршители, но има проблем со дел од фирмите, кои во меѓувреме биле затворени.

„Голем дел се на извршител и се наплаќаат сумите и си ги префрла на државен буџет. Има и затворени фирми, предадени се на Финансова и на Организиран криминал на МВР. До оние кои имаат активна обврска, но ги избегнале обврските за исплата на оперативна добивка и ројалти кон Фондот, а се под договор, доставена им е опомена пред тужба“, рече Додов за Фактор.

Надворешниот Комитет кој одлучува за договорите пак, деновиве донел нова одлука – раскинати се уште 17 договори, а од нив 13 веќе се дадени на извршител. За останатите четири имало жалби кои мора повторно да поминат пред Комитетот.

Додов пред примопредавањето на функцијата на директорката на новоформираната ИНОВА, Даниела Димовска, преку социјалните мрежи обвини дека институцијата како таква не постои затоа што ја изгубила суштината, поради злоупотреби и клиентелизам.

„Овој Фонд, како што беше досега, повеќе не постои. Постои само визија за нова, чесена и силна институција, што ќе служи на граѓаните, а не на поединци. Не затоа што не ни треба институција за поддршка на иновации, туку затоа што оваа форма на институција одамна ја изгубила својата суштина. ФИТР, каков што го затекнавме, беше синоним за злоупотреба, клиентелизам и заробена структура”, напиша Додов.

Фондот последните години го тресеа низа скандали – од фиктивни проекти, до прелевање на пет милиони денари за проекти на две фирми на Дрин Ахмети, внук на лидерот на ДУИ, Али Ахмети.

Кривични пријави се поднесени и против поранешните директори на ФИТР, Фестим Халили и Коста Петров, под сомнение дека ја злоупотребиле службената положба и овозможиле незаконски исплати на грантови, а за три проекти: „Грин Хојо“, „Фротирка АД Делчево“ и „Тајната на Римјаните“ - за штета врз буџетот од над 23 милиони денари.