„ПРЕД ОЧИТЕ МИ Е САМО ЕДНА СЛИКА“: Исповед на фудбалерот кој паѓал заедно со мостот во Џенова

Добивај вести на Viber

Двајца италијански фудбалери со неверојатна среќа ја преживеале трагедијата на мостот Моранди кој се урна во вторникот на автопатот кај Џенова.

Поранешниот голман Давид Капело ја преживеал стравичната несреќа кога италијанскиот надвозник се урнал кај Џенова.

Капело имал неверојатна среќа откако мостот почнал да се урива, а според зборовите на италијанскиот портал illusidario.net, во својот автомобил паѓал 80 метри низ мостот кој се уривал.

„Паѓав заедно со мостот и не знам што ме спаси. Автомобилот е уништен, но јас сум добро. Кога излегов од автомобилот врнеше премногу дожд“, го снимил фудбалерот во гласовна порака на WhatsApp и додал дека ни сам не знае дали молња удрила во мостот или не.

„Пред очи ми е само една слика: мост кој се урива“, ги пренесуваат италијанските медиуми зборовите на Капело.

Ги замолил пријателите да се молат за Џенова

Италијанскиот фудбалер Доменико Крисцито пак мостот Моранди го поминал само 10 минути пред трагедијата. На својот Инстаграм профил тој им упатил поддршка на настраданите и нивните семејства.

„Го пишувам ова поради оние кои се грижат за мене и моето семејство. Сите сме добро иако на тој мост бевме само 10 минути пред да се урне“, ја започнал пораката Крисцито.

„Сочувствувам со семејствата на жртвите. Невозможно е мостот на автопатот така да се урне. Невозможно! Мораме да направиме нешто за оваа земја. Поради вакви работи луѓето бегаат од земјата. Ни треба безбедност, ни треба некој да направи нешто. Ова е ужасно“ - пишува фудбалерот кој ги замолил пријателите да се молат за Џенова.