ПРЕГОВОРИ ЗА ЧЛЕНСТВО ДА, ПАРИ НЕ! Орбан блокираше 50 милијарди евра помош за Украина
Објавено во: Свет 15 Декември, 2023
Унгарија денеска го блокираше договорот на
Европската унија за 50 милијарди евра за Украина од буџетот на Унијата, а
лидерите на ЕУ одлучија да се вратат на дискусијата во јануари, изјави
холандскиот премиер Марк Руте.
Тој додаде дека 26 земји од ЕУ се согласиле да и обезбедат на Украина пари од буџетот на ЕУ до 2027 година, но Унгарија била против тоа, а потребна е едногласна одлука.
„Имаме уште малку време, Украина нема да остане без пари во следните неколку недели“, им рече Руте на новинарите додека ги напушташе разговорите, пренесе Ројтерс.
Сосема сум уверен дека можеме да постигнеме договор на почетокот на следната година, мислиме на крајот на јануари“, рече Руте и додаде дека ќе има уште еден самит за да се постигне договор.
Неколку дипломати изјавија за ДПА дека Орбан ги спречил лидерите на ЕУ да постигнат договор за пакетот финансиска поддршка.
На Твитер, Орбан напиша дека лидерите на ЕУ ќе го разгледаат договорот повторно следната година „по соодветна подготовка“.
Одлуката за нов пакет помош за Украина беше отежната поради фактот што продолжувањето на финансиската поддршка за Киев е дел од законскиот предлог за опсежна ревизија на долгорочниот буџет на ЕУ.
Европската унија работи со седумгодишни буџетски системи, а сегашниот заеднички буџетски период е до 2027 година. На почетокот на оваа година, Европската комисија предложи финансиска поддршка на Украина од 50 милијарди евра до 2027 година, од кои 33 милијарди евра ќе бидат издадени како заеми, а 17 милиони евра како грантови.
Лидерите на земјите-членки на ЕУ вчера, на првиот ден од самитот, одлучија да ги отворат пристапните преговори со Украина и Молдавија, одобрија кандидатски статус за Грузија, а преговорите со Босна и Херцеговина ќе бидат отворени кога ќе се исполнат критериумите за членство на потребниот обем, објави претседателот на Европски совет, Шарл Мишел.
ФОТО: EPA-EFE/OLIVIER MATTHYS