Преку филијалите во Лондон и Москва повлечени стотици милиони евра од кипарските банки

Добивај вести на Viber

Стотици милиони евра се повлечени од кипарските банки преку нивните филијали во Лондон и Москва тогаш кога обичните Кипарци не можеа да повлечат од банкоматите повеќе од 100 евра на ден, соопшти денеска грчката телевизија Мега.

Според информации на телевизијата, на остри критики е подложен гувернерот на кипарската Централна банка, Паникос Димитриадис, кој во екот на кризата одобри да продолжат со работа филијалите на Банката на Кипар и Кипарската народна банка во Лондон. На овој начин стана возможно повлекување на огромни суми од сметките во кипарските банки во британската престолнина и преку една банка во Москва.

Повлекувањето на стотици милиони евра од филијалите на кипарските банки во странство е правдано со неопходноста од купување хуманитарна помош, лекарства или гориво за авионите.

Европските преговарачи дознаа дека нешто не е во ред кога кипарската Централна банка побара повеќе пари од сумата, која првично беше пријавена во Европската централна банка.

Грчката телевизија Мега посочува дека гувернерот на кипарската Централна банка Паникос Димитриадис во моментов е цел на напад од целото политичко раководство заради неговите активности за време на кризата и има се повеќе барања за негова оставка. За да се случи тоа, меѓутоа, неопходни се промени на Уставот на островот, а самиот банкар истакнува дека ЕЦБ позитивно ја оценува неговата работа на позицијата гувернер на Централната банка.