ПРЕНЕСЕНИ СЕ ВО ИНСТАНБУЛ: Уште три повредени лица од пожарот ќе се лекуваат во Турција

Добивај вести на Viber

Уште три лица повредени од пожарот во Кочани ќе се лекуваат во Турција. 

Информацијата ја потврдија од турската амбасада. Три млади лица денеска со авион се пренесени во болницата „Чам и Сакура“ во Истанбул. Турскиот амбасадор во земјава Фатих Улусој ги придружувал повредените на Меѓународниот аеродром, при нивното заминување од Скопје. Моментално во Турција се лекуваат вкупно 12 повредени. Од нив, половина се во болницата „Чам и Сакура“ во Истанбул, додека другата половина во болницата „Билкент Шехир“ во Анкара.

И заменик министерот за надворешни работи и главниот преговарач со ЕУ, Мехмет Кемал Бозај, изразил сочувство до целиот народ на Македонија. 

„Како што се сеќавате, Северна Македонија, по разорниот земјотрес што ја погоди нашата земја во 2023 година, испрати тимови за спасување. Така и ние, веднаш по овој трагичен настан, испративме авиони и деветмина државјани на Северна Македонија ги пренесовме во Турција за лекување. Во оваа прилика, уште еднаш изразувам длабоко сочувство до целиот народ на Северна Македонија и им посакувам брзо заздравување на ранетите“, изјавил Бозај.

Денеска беа погребани загинатите во пожарот кој во неделата се случи во дискотеката „Пулс“ во Кочани. Повредените се лекуваат во Србија, Бугарија, Грција, Шведска, Полска и други земји.