ПРЕВИРАЊА ВО ФБИ ПОРАДИ ЕПШТАЈН: заменик-директорот размислува за оставка, Трамп не ја разбира „опсесијата со случајот“

Добивај вести на Viber

Заменик-директорот на Федералното истражно биро (ФБИ) Ден Бонгино размислува за оставка поради ескалацијата на конфликтот меѓу агенцијата и Министерството за правда на Соединетите Американски Држави во врска со обработката и објавувањето на досиејата поврзани со финансиерот Џефри Епштајн, соопштија извори блиски до агенциите.

Кризата кулминираше за време на состанокот одржан во среда, на кој присуствуваа Бонгино, главниот обвинител Пам Бонди, директорот на Федералното истражно биро Каш Пател и шефот на кабинетот на Белата куќа Сузи Вајлс, пишува CNN.

За време на состанокот беа покренати прашања во врска со тврдењето на ФБИ дека го поддржува поширокото објавување на податоци, додека Министерството за правда наводно ја блокирало одлуката.

Според изворите, Бонџино негирал дека им ги дал информациите на новинарите, но не потпишал формална изјава за веродостојноста на спорниот извештај.

Американските медиуми објавија дека Бонгино не бил присутен на работа во петокот, што предизвика шпекулации за негова оставка, но тој формално не поднел оставка до вечерта.

Конфликтот дополнително се заостри претходно оваа недела кога Министерството за правда објави меморандум во кој се вели дека нема докази дека Епштајн бил убиен или дека имал таканаречен „список на клиенти“.

Некои службеници на ФБИ, вклучувајќи ги Бонгин и Пател, беа фрустрирани од начинот на кој постапи Бонди, тврдејќи дека снимките од надзорните камери од затворот каде што почина Епштајн биле исечени - при што минути од снимките биле изоставени, поттикнувајќи теории на заговор.

Бонди објасни дека станува збор за технички проблем - снимката автоматски се ресетира секој ден на полноќ, но, како што истакнува CNN, ова не ги смири критиките на јавноста.

Според изворите, Бонџино и Пател со месеци го изразуваат своето незадоволство од начинот на кој Министерството за правда комуницира за случајот и презентира информации на јавноста.

Трамп пред медиумите изјави дека државната обвинителка Пем Бонди треба да објави сè што смета дека е веродостојно за сексуалниот престапник Џефри Епштајн. Изјавата на Трамп доаѓа во време кога тој се соочува со отпор од поддржувачите кои не сакаат случајот да се затвори, јави Би-Би-Си.

Обвинителката Бонди добила критики од дел од политичката база на Трамп, откако минатата недела истакнала дека нема докази дека Епштајн имал список на клиенти или дека уценувал моќни личности.

– Таа се справува многу добро со ова и ќе зависи од неа. Што и да смета дека е веродостојно, треба да го објави – изјави Трамп.

Кога новинар прашал дали државната обвинителка го информирала Трамп дали неговото име се појавува во некои од документите, тој одговорил со „Не, не“.

Трамп за време на викендот ги повика поддржувачите да не губат време и енергија за овие наводи. Но, сојузниците на Трамп, вклучувајќи го и претседателот на Претставничкиот дом Мајк Џонсон, инсистираат на транспарентност.

Подоцна во вторник, Трамп повторно повика на објавување на веродостојни информации за случајот со Епштајн, но прашал зошто трае опсесијата со случајот Епштајн, нарекувајќи го „валкан, но здодевен“.

Џефри Епштајн, осуден сексуален престапник, беше пронајден мртов во затворска ќелија во Њујорк во август 2019 година, додека чекаше судење за организирање трговија со малолетници.

Неговата смрт официјално е окарактеризирана како самоубиство, но бројни детали, вклучувајќи наводни безбедносни пропусти и технички неправилности, предизвикаа бројни теории за можно прикривање.