Приватното земјиште во Бардовци било скапо за Филипче
Објавено во: Економија 09 Октомври, 2018
Седум месеци по мартовската најава дека кај село Бардовци ќе се гради новиот Клинички центар, здравствените власти заклучиле дека приватните земјишни парцели се прескапи за откупување поради што ќе треба да се определи нова локација. Навестувањето дека ќе се бара нова локација за ваков капитален објект вчера го даде министерот за здравство Венко Филипче кој рече дека финансиските пресметки ги менуваат нивните планови.
– Работна група разгледува и други локации, но во тој предел, овде ќе требаше да потрошиме многу пари што е без потреба трошок, рече министерот Филипче.
Според информациите, новата локација сега се бара во атарот на село Злокуќани, блиску до скопската Обиколница, каде целото земјиште е во државна сопственост. Но и ова не е дефинитивно решение.
Инаку, во март годинава на прес-конференцијата токму министерот Филипче најави дека Клиничкиот центар ќе се дислоцира во населбата Бардовци во близина на Психијатриската болница. Одлуката била донесена по препораките на стручната јавност и предлогот на Асоцијацијата на архитекти на Македонија.