Продажбата на Еурокомпозит е одложена зошто се чека купувачот да формира фирма во САД?!
Објавено во: Економија 27 Септември, 2013
Американска, Хрватска, Турска и компанија која е во фаза на основање од страна на две физички лица во Америка се заинтересирани за купување на Еурокомпозит. Секоја треба да плати по 1.000 евра за ја да подигне тендерската документација за прилепскиот загубар.
Нови 30 дена Владата му дава на еден од потенцијалните инвеститори во прилепскиот загубар Еурокмпозит за да основа фирма и да се јави на тендерот. Американска, Хрватска, Турска и компанија која е во фаза на основање од страна на две физички лица во Америка се заинтересирани за купување на Еурокомпозит.
Иако рокот за доставување на понуди за купување на Еурокомпозит од Прилеп беше 20 септември, сепак, Владата по барање на еден од можните купувачи го продолжи рокот за уште еден месец.
“На барање на една од компаниите, рокот за подигнување на документацијата се одложи со цел завршување на постапките за формирање на друштво за оваа намена. Сите четири компании се известени за одложувањето на рокот за доставување на понуди“, изјавија од Министерството за економија за Фактор. Пред повеќе од еден месец хрватскиот инвеститор од Славонски Брод, Ѓуро Ѓаковиќ беше заинтересиран за прилепскиот загубар, но не успеа да достави понуда за тендерот во предвидениот рок. Од Владата побарале продолжување на рокот за доставување на понуди, но Владата тогаш не прифати, па го распиша новиот тендер.
“Во претходната постапка за продажба на акциите на Република Македонија во 11 Октомври Еурокомпозит, една хрватска компанија подигна тендерска документација, но не достави понуда, бидејќи кратки беа роковите за да ја подготви понудата, поради што бараа одложување на роковите. Одложувањето на јавниот повик не се направи, но се објави нов јавен повик за прибирање на понуди за продажба на аакциите на Еурокомпозит на почетокот од август“, објаснија за Фактор од Министерството.
Сега крајот на октомври годинава е новиот рок до кога заинтересираните инвеститори за Еурокомпозит треба да достават понуди.
Според информациите во тендерот, овој загубар ќе се продава со 373 вработени и со сите 3.708.038 акции сопственост на државата. Заинтересираните инвеститори треба да платата по 1.000 евра за да ја подигнат тендерската документација од Министерството за економија.
“За учество на тендерот ќе треба да се достави банкарска гаранција од 68.000 евра, бонитет за последните 3 години од по 2 милиони евра, програма за дополнителни инвестиции кои треба да ги реализира инвеститорот во период од 3 години, при што ќе се задржат на работа сите вработени. Дејноста на производството не смее да се менува“, стои во тендерот.
Македонската Берза се уште не нуди информации за тоа како Еурокомпозит ги заврши првите два квартали од годинава. К.П