ПРОНАЈДЕНИ ЧОВЕЧКИ ОСТАТОЦИ ВО КУФЕР КУПЕН НА АУКЦИЈА, семејство од Нов Зеланд останало фрапирано по отворањето
Објавено во: Економија 16 Август, 2022
Полицијата на Нов Зеланд истражува „сомнителна смрт“ откако едно семејство пронашло човечки останки во куфери што ги купиле на аукција во складиште.
Жителите на Јужен Окленд дошле до страшното откритие откако ги отпакувале купените предмети во нивната резиденција. По нивната пријава, полициските власти веднаш започнале истрага за убиство и се обидуваат да ги идентификуваат останките, објавува Би-Би-Си.
Според официјалните лица, засега се смета дека семејството кое ги пријавило останките не е вмешано во инцидентот.
Познато е дека семејството отишло во складиштето за препродажба на залутани предмети и купило приколка со стока - во која биле вклучени куферите - од локална компанија за складирање.
- Откритието е направено откако жителите го однеле имотот во својот дом - појаснил детективот Тофилау Фаамануиа Ваелуа.
Неколку соседи на семејството исто така пријавиле „лош мирис“ што излегува од имотот пред да пристигне полицијата, според Stuff.
Еден сосед - поранешен работник во крематориум - рече дека мирисот веднаш се препознава.
- Веднаш знаев и се замислив од каде доаѓа тоа? - рече тој, мислејќи на имотот на жителите.
Друг сосед рече дека нејзиниот син забележал како се симнува куфер од приколката пред да биде сместен во форензички шатор кој бил подигнат околу просториите.
Снимките објавени на новозеландската новинска агенција Stuff покажаа приколка паркирана на предната патека на имотот, кој се наоѓа во приградската област на Клендон Парк, додека полицијата ги спроведуваше своите истраги.
Полициските службеници рекоа дека нивен приоритет е „да се потврди идентификацијата на починатиот, за да може да се утврдат целосните околности зад откритието“.
Тие додадоа, со оглед на „природата на откритието“, ќе биде потребно време за да се информираат најблиските.
Фото: Принскрин/ Stuff