Протести во Италија: Државните училишта не се на продажба!

Добивај вести на Viber

Неколку илјади професори денеска излегоа на протести во Рим и неколку други италијански градови против мерките за штедење на Владата, кои предвидуваат драстично намалување на трошоците за образование, пренесоа италијанските медиуми. По долги години буџетски кратења, италијанските професори пред се од средните училишта,  стравуваат дека ако биде усвоен новиот владин нацрт план, образовните институции полесно ќе ноже да добиваат пари од приватните фондови наместо од државата, што ќе значи и големо намалување на правата на наставниците. Меѓу паролите, со кои протестираа демонстрантите пишуваше и "НЕ на уништувањето на државните училишта", "Дозволете ни да ја креираме сопствената иднина" , "Државните училишта не се на продажба". Ова е прва голема акција по заедничкиот штрајк на 14 ноември во 100 градови во Италија, кога мировните поворки прераснаа во судири со полицијата. Во Неапол демонстрантите фрлаа петарди, а во Палермо стотици демонстранти дефилираа, следејќи картонски ковчег кој ја симболизираше "смртта на државното училиште".  Во Пиза околу 250 демонстранти извикуваа „ Не сме стока за продажба“. Во Фиренца група ученици за кратко го блокираше и сообраќајот на возовите, а на еден од вагоните на брзите возови Евростар беше истакнат плакат со натпис: „Учениците имаат еден недостаток - тие мислат“.