ПУШТЕН ВО УПОТРЕБА: Колку ќе заработи првиот приватен ветерен парк во Македонија?

Добивај вести на Viber

Првиот приватен ветерен парк во Македонија, чиј инвеститор е „Тхор Импекс“ и кој беше пуштен во погон на 24 јануари, ќе заработи 7 милиони евра во првата година од своето работење. „Богословец“ започна со работа со осум ветерни турбини помеѓу Штип и Свети Николе, а вкупната моќност на паркот изнесува 35 мегавати. 

Според пријавеното во Агенцијата за Енергетика и Регулаторната комисија за енергетика, проектирано е производство на „Богословец“ од 78.600.000 киловатчасови годишно. Повластената тарифа, која како производител од обновливи извори на енергија ќе ја добива од националниот оператор на пазарот МЕМО, е одредена да биде 8,9 евроценти по киловатчас. Тоа значи дека „Тхор Импекс“ годишно ќе заработува проектирани 6.995.400 евра.

Ова е запишано во прегледот на повластени производители на електрична енергија кај Регулаторната комисија за енергетика и во Одлуката за користење на повластената тарифа, откако „Богословец“ ја доби лиценцата за работа во текот на февруари.

Првата приватна ветерна централа ќе заработува исто колку што добива и АД ЕСМ за ветерната централа „Богданци“ која ја добива истата повластена тарифа и има речиси еднаков капацитет на работа, Струјата со повластени тарифи во Македонија се купува и од малите хидроелектрани и од биогасните централи. 

Иако приватната инвестиција за прв пат од ваков тип беше промотивно најавувана, изостанаа подеталните информации за компанијата што ќе го гради ветерниот парк. Инвестицијата беше кажано дека ќе чини 61 милион евра и ќе се реализира во општините Свети Николе и Штип.

Како управител на Тхор Импекс, според претходни медиумски информации, се јавува Благоја Лазаровски. Компанијата е во сопственост на Б Н Б – КОМПАНИ ДОО експорт-импорт Скопје и Грин фор Гроутх Фонд, Југоисточна Европа СА, СИЦАВ-СИФ, Луксембург.

Власта најави дека ветропаркот Богословец со предвидените осум турбини и моќност од 36 мегавати ќе го удвои постојниот ветерен капацитет во земјата и ќе придонесе кон намалување на ЦО2 емисиите од над 87 илјади тони годишно. Инвестицијата во наредните 25 години треба да придонесе во обезбедување стабилно снабдување со зелена и еколошка електрична енергија за околу 20 илјади домаќинства.