Пуштена е во оптек кованатa пара „Мајка Тереза“

Добивај вести на Viber

Пуштена е во оптек кованатa пара за колекционерски цели „Мајка Тереза“.

Народната банка ја издава оваа кована пара по повод прогласувањето на Мајка Тереза за светица во септември годинава.

На аверсот на кованата пара во централниот дел е претставен грбот на Република Македонија и натписот „2016“. Околу монетата, по должината на периметарот, се прикажани натписите на македонски јазик: „Република Македонија“ и „100 денари“.

На реверсот, во централниот дел на монетата е прикажан портрет на Мајка Тереза. На левата страна, во заднината, се прикажани украси во форма на крстови и срца. Во долниот дел од левата страна е претставен цвет од повитот „Мајка Тереза“ („Matka Teresa“), одгледуван од страна на г. Стефан Франчак, полски језуитски монах. На десната страна се прикажани датумите „1910 ‒ 1997“ (годините на раѓање и на умирање на Мајка Тереза) и „2016“ (годината на нејзината канонизација). Исто така, прикажано е латинското име „Sancta Teresia de Calcutta“ (света Тереза од Калкута), како и името на Мајка Тереза, на македонски и на албански јазик.

Кованата пара е изработена од сребро Ag925, со тежина на среброто од 28,28 г, чистота на среброто од 26,16 г и во кружна форма со димензија 38,61 мм.

Кованите пари за колекционерски цели издадени од Народната банка се законско средство за плаќање во Република Македонија.